उत्तर प्रदेशमधील मुस्लीम युवकांनी केले अभिवादन

वाघोली, ता. १ : थेट उत्तर प्रदेश येथून १५ मुस्लिम युवकांनी येऊन विजयस्तंभास अभिवादन केले. प्रशासनाने सुविधा उत्तम दिल्याबद्दल त्यांनी समाधान व्यक्त केले. पेरणे फाटा येथील विजयस्तंभ २०८ व्या शौर्य दिनानिमित्त देशभरातून अनेक समाज बांधव लाखोंच्या संख्येने येतात. यामध्येच उत्तर प्रदेश येथील आझमगड येथून १५ मुस्लीम अनुयायी हाती निळे ध्वज घेऊन अभिवादन करण्यासाठी आले होते, प्रशासनाने दिलेल्या उत्तम सुविधेबद्दल त्यांनी समाधान व्यक्त केले. आपण तीन वर्षांपासून येथे येत असल्याचे सांगत पूर्वजांचा हा इतिहास भावी पिढीस माहीत व्हावा यासाठी आम्ही येतो. दर वर्षी कुटुंबीयांसोबत येऊन अभिवादन करणार असल्याचे महम्मद अदनान या तरुणाने सांगितले. या मुस्लीम अनुयायांनी हातात निळे ध्वज घेत बाबासाहेबांच्या नावाचा जयघोष करताना परिसरातील भीम अनुयायांना अभिमान वाटत होता.