पाटसला बिबट्याचा धुमाकूळ

पाटस, ता. ९ : पाटस (ता. दौंड) येथील गार फाटा भागात बुधवारी (ता. ९) पहाटे बिबट्याच्या हल्ल्यात घोड्याचे एक शिंगरू व शेळीचा मृत्यू झाला. परिसरात बिबट्याच्या आगमनाने भितीचे वातावरण पसरले असून, वनविभागाने बिबट्याचा बंदोबस्त करण्याची मागणी ग्रामस्थांनी केली.
गार फाटा परिसरात उसाचे मोठे क्षेत्र आहे. येथील मेंढपाळ सोमनाथ कोकरे यांचा एका शेतात मेंढ्यांचा वाडा
आहे. बुधवारी पहाटे कळपातील घोडीचा ओरडण्याचा आवाज आल्याने कोकरे व त्यांचे वडील जागे झाले. त्यांनी घोडीकडे धाव घेतली. त्यावेळी शिंगरू नसल्याचे लक्षात आले. सकाळी शोध घेताना त्यांना बाजूच्या उसाच्या शेतात अर्धवट फस्त केलेल्या शिंगराचा मृतदेह आढळला. यावेळी शिंगराला वाड्यापासून फरफटत नेल्याच्या खुणा दिसल्या. तसेच, बिबट्याच्या पायाचे ठसे आढळून आले. कळपातील एक शेळी देखील गायब झाल्याने कोकरे यांच्या लक्षात आले.
याबाबत त्यांनी वनविभागाशी संपर्क साधला. मात्र, घटनास्थळी केवळ वनमजूर बाळासाहेब कोकरे यांनी हजेरी लावली. त्यानंतर दुपारी तीन नंतर वनरक्षक रामेश्वर तेलंग्रे यांनी घटनास्थळी भेट देवून पाहणी केली. प्रहार दिव्यांग क्रांती संस्थचे तालुकाध्यक्ष बाळासाहेब नानवर यांनी घटनेबाबत दौंड वनपरिक्षेत्र अधिकारी राहुल काळे यांच्याशी संपर्क साधून घटनेबाबत माहिती दिली. त्यांनी संबंधित वनअधिकारी यांना तत्काळ घटनास्थळी पाठवून देतो, असे सांगितले. मात्र, दिवसभर संबंधित अधिकारी घटनास्थळी आले नसल्याचे नानवर यांनी सांगितले. यावेळी वनविभागाच्या भूमिकेवर नागरीकांनी तीव्र शब्दात नाराजी व्यक्त केली.
दरम्यान, बिबट्याचे परिसरात आगमन झाल्याने नागरिकांमध्ये कमालीची भीती निर्माण झाली आहे. वनविभागाने याबाबत गांभीर्याने घेऊन बिबट्याचा बंदोबस्त करण्याची मागणी सोमनाथ कोकरे व बाळासाहेब नानवर यांनी केली.
याबाबत तालुका वनपरिक्षेत्र अधिकारी राहुल काळे म्हणाले, ‘‘नागरीकांनी सतर्क राहावे. रात्रीच्या वेळी एकटे फिरू नये. पाळीव प्राण्यांना सुरक्षीत ठिकाणी बांधावे.लहान मुलांना शिवारात एकटे फिरू देवू नये.’’