पुणे प्रादेशिक वनविभागाच्या वनसंरक्षकपदी आशिष ठाकरे

वरवंड, ता. १३ : पुणे प्रादेशिक वनविभागाच्या वनसंरक्षकपदी (सीएफ) आशिष ठाकरे (आयएफएस) यांची नियुक्ती करण्यात आली. मुख्यवनसंरक्षक एन. आर. प्रवीण यांची नियोजित कार्यकाळ संपताच ठाणे येथे बदली झाल्याने त्यांच्या जागी वनसंरक्षक ठाकरे यांची वर्णी लागली.
पुणे प्रादेशिक वनविभागाच्या वनसंरक्षकपदाच्या अंतर्गत पुणे, जुन्नर, भोर, सोलापूर या विभागांचा समावेश आहे.
पुणे प्रादेशिक वनविभाग हा राज्यात महत्त्वाचा व संवेदनशील मानला जातो. या अगोदरचे मुख्यवनसंरक्षक (सीसीएफ) एन.आर. प्रवीण यांनी नियोजित कार्यकाळात जोरदार कामगिरी बजावली. त्यांच्या बदली नंतर कोणाची वर्णी लागते. याकडे सर्वांचे लक्ष लागले होते. मात्र,पुणे प्रादेशिक वनविभागात यंदा प्रथमच मुख्यवनसंरक्षक (सीसीएफ) ऐवजी वनसंरक्षक (सीएफ) हे पद कार्यान्वित करण्यात आले. या पदावर नुकतीच ठाकरे यांची नियुक्ती
करण्यात आली. त्यांनी पदाचा नुकताच कार्यभार स्वीकारला. ठाकरे यांनी या अगोदर वेगवेगळ्या जिल्ह्यात उपवनसंरक्षक तसेच पुणे संशोधन विभागात वनसंरक्षक पदावर काम करून ठसा उमटविला आहे. त्यांची कर्तव्यदक्ष व शिस्तप्रिय अशी ओळख आहे. पुणे तसेच जुन्नर विभागात वाढता मानव-बिबट संघर्ष टाळण्यासाठी त्यांच्याकडून ठोस उपाययोजना होतील अशी अपेक्षा व्यक्त होत आहे.

00551