रेल्वेस्थानकाजवळ आढळला मृतदेह

वरवंड, ता. २४ ः कडेठाण (ता. दौंड) येथील रेल्वेस्थानक हद्दीत रेल्वेरुळाच्या बाजूला एका व्यक्तीचा मृतदेह आढळून
आला. रेल्वेच्या धडकेत त्याचा मृत्यू झाल्याचा अंदाज पोलिसांनी वर्तविला आहे. रमेश अग्रवाल (वय ४८, रा. पिंपरखेड, ता. तेलहरा, जि. अकोला) असे मृताचे नाव आहे. याबाबत अधिक माहिती अशी की, येथील रेल्वेस्थानक हद्दीत एका व्यक्तीचा रक्ताने माखलेला, तसेच डोक्यावर जखम असलेला मृतदेह आढळून आला. दोन्ही दिशेच्या रेल्वेमार्गाच्या मधोमध तो पडला होता. याबाबत माहिती मिळताच पाटस पोलिस चौकीचे पोलिस हवालदार के. एन. पानसरे, पोलिस नाईक गणेश मुटेकर यांनी घटनास्थळी धाव घेतली. मृतदेहाची पाहणी करून शवविच्छेदनासाठी पाठवून दिला. त्याच्या खिशातील चिठ्ठीवरून त्याची ओळख पटविण्यास पोलिसांना यश आले. रेल्वेच्या धडकेत त्याचा मृत्यू झाल्याचा अंदाज पोलिसांनी वर्तविला आहे. या प्रकरणी पुढील तपास हवालदार पानसरे करीत आहे.