वरवंडप्रकरणी सात तपास पथके

वरवंड, ता. २९ : येथील धर्मडी डोंगरावरील एका धार्मिक स्थळावरील मूर्तीच्या तोडफोडीच्या घटनेच्या पार्श्वभूमीवर तपासासाठी पोलिसांची वेगवेगळी सात पथके रवाना केली आहेत. परिसरातील सीसीटीव्ही फुटेज तपासण्याचे काम जोमात सुरू करण्यात आल्याचे उपविभागीय पोलिस अधिकारी बापूराव दडस यांनी सांगितले.
वरवंड येथील धर्मडी डोंगरावरील धार्मिक स्थळावरील मूर्तीची दोन दिवसापूर्वी तोडफोड केली होती. या घटनेनंतर गावातील ग्रामस्थांनी तीव्र संताप व्यक्त करीत पोलिसांना संबंधित घटनेबाबत कारवाईची मागणी केली. या घटनेनंतर पुणे ग्रामीण पोलिस अधीक्षक संदीपसिंह गिल यांनी यवत पोलिस ठाण्यात भेट देऊन घटनेची माहिती घेऊन तपासाबाबत आवश्यक सूचना दिल्या. गावात शांतता व कोणताही अनुचित प्रकार घडू नये, यासाठी आवश्यक ठिकाणी पोलिस बंदोबस्त ठेवण्यात आला.
याबाबत सरपंच योगिता दिवेकर म्हणाल्या, ‘‘संबंधित घटना निंदनीय आहे. पोलिसांनी याबाबत सखोल चौकशी करून कारवाइ करावी.’’ पोलिस पाटील किशोर दिवेकर म्हणाले, ‘‘या घटनेबाबत ग्रामस्थांनी शांततेची भूमिका घेवुन पोलिस प्रशासनाला सहकार्य केले. ग्रामस्थांनी विघातक कृत्य करणाऱ्याचा उद्देश सफल होऊ दिला नाही. उलट जातीय सलोख्याने सर्वांनी घटनेबाबत सखोल चौकशी करुन कारवाईची मागणी केली.’’