बारामती परिवहन कार्यालयाकडून जप्त वाहनांचा लिलाव

वडगाव निंबाळकर, ता. १७ : मोटार वाहन कर न भरलेल्या आणि विविध गुन्ह्यांमध्ये जप्त केलेली १८ वाहने बारामती उपप्रादेशिक परिवहन कार्यालयाने ताब्यात घेतली आहेत. वाहनमालकांना वारंवार नोटीस बजावूनही आवश्यक प्रक्रिया झाली नाही. यामुळे वाहनमालकांनी कार्यालयात येऊन आवश्यक प्रक्रिया पूर्ण करून वाहने सोडवून घ्यावीत. वाहने सोडवली नाही तर वाहने धातू भंगार व व्यापार महामंडळातर्फे संबंधित वाहनांचा लिलाव प्रक्रिया www.mstcecommerce.com या संकेतस्थळावर येत्या २९ जुलै २०२५ ला पार पडणार आहे. यात एकूण १८ वाहनांचा समावेश आहे.
या निर्णयामुळे प्रशासनाकडे दीर्घकाळ पडून असलेली वाहने विक्री करून महसूल मिळवण्याचा मार्ग मोकळा होणार आहे. संबंधित वाहनमालकांनी किंवा ताबेदारांनी वाहनांच्या लिलावाबाबत आपले हक्क प्रस्थापित करण्यासाठी अधिक माहिती बारामती आरटीओ कार्यालयात येऊन घ्यावी आणि दिलेल्या मुदतीपूर्वी आपली प्रक्रिया पूर्ण करावी, असे आवाहन उपप्रादेशिक परिवहन अधिकारी सुरेंद्र निकम यांनी केले आहे.