राजगडावर पर्यटक महिलेचा १५० फूट कोसळून मृत्यू

वेल्हे, ता. ६ : पर्यटनासाठी पतीसह किल्ले राजगड (ता. राजगड) येथे आलेल्या महिलेचा बालेकिल्ल्यावरून उतरताना सुमारे दीडशे फूट कोसळून मृत्यू झाल्याची घटना गुरुवार (ता. ५) सायंकाळी साडेपाचच्या सुमारास घडली. कोमल सतीश शिंदे (वय २०, रा. आळंदी, ता. खेड) पुणे असे मृत महिलेचे नाव आहे.
याबाबत पोलिसांनी माहिती दिली की, कोमल ही पतीसह राजगडावर पर्यटनासाठी आली होती. सायंकाळी साडेपाच वाजण्याच्या सुमारास बालेकिल्ला पाहून झाल्यानंतर उतरताना ती कोसळली. त्यात जखमी झाल्याने तिचा मृत्यू झाला. मृतदेह गडावरून खाली आणण्यासाठी पोलीस जवान युवराज सोमवंशी यांच्यासह आपत्ती व्यवस्थापन टीमचे सदस्य तानाजी भोसले, गणेश सपकाळ, संजय चोरघे, नीलेश जाधव, संदीप सोळसकर, सनी माने यांनी गडावर धाव घेत स्ट्रेचरच्या साह्याने मृतदेह गडावरून खाली आणला. दुपारी पाऊस पडल्याने गडावरील वाट निसरडी झाल्याने मृतदेह खाली आणण्यास मोठा अडथळा निर्माण झाला होता. दरम्यान, कोमल हिचा उपचारापूर्वीच मृत्यू झाल्याची माहिती गुरुवारी रात्री साडेअकराच्या सुमारास वेल्हे येथील ग्रामीण रुग्णालयाचे डॉक्टर शिवाजी कुरणकर यांनी दिली.