युवकाच्या खूनप्रकरणी पाच हल्लेखोरांना बेड्या

वेल्हे, ता.१८ : पानशेत (ता.राजगड) येथे आदिवासी कातकरी समाजाचा युवक रोहिदास काळुराम काटकर ( वय २४, रा.कादवे ,ता. राजगड) याचा खुन करणाऱ्या पाच हल्लेखोरांना अटक करण्यात ग्रामीण पोलिसांना यश आले आहे.
आकाश सुभाष भिसे (वय.२१,सद्या रा.वाल्हेकर चौक, नऱ्हे,ता.हवेली, मूळ गाव.झरी,पो.मानोद,ता.पाथरी, जि. परभणी), भागवत मुंजाजी आसोरे (वय.२०,सद्या रा.कानडे हाईट्स,नऱ्हे), रितेश उत्तम जोगदंड (वय.२१,रा.ज्ञानेश्वर पार्क बिल्डींग नऱ्हे), उमेश ऊर्फ भैय्या रामभाऊ शेळके (वय.२१ रा.पेडगाव, परभणी), पांडुरंग भानुदास सोनवणे (वय.१८ वर्षे,६ महीने सद्या रा.चारभुजा रेसीडेन्सी नऱ्हे, सर्व रा. मुळ रा.पेडगाव,जि.परभणी) अशी अटक करण्यात आलेल्या हल्लेखोरांची नावे आहेत.
न्यायालयाने पाचही हल्लेखोरांना २२ जूनपर्यंत पोलिस कोठडीत ठेवण्याचे आदेश दिले आहेत . दरम्यान, रविवारी (ता.१५) रात्री आठ वाजण्याच्या सुमारास पानशेत येथे नंदाबाई कुंभार यांच्या हॉटेल समोर मोटरसायकलवरून आलेल्या आकाश भिसे व त्याच्या साथीदार हल्लेखोरांनी रोहिदास काळुराम काटकर व त्याचा मित्र विजय पांडुरंग जाधव यांच्यावर हल्ला केला. रोहिदास याला लाथा बुक्क्यांनी बेदम मारहाण करत हल्लेखोरांनी मोठ्या दगडाने ठेचून त्याचा खून केला. हल्ल्यात विजय जाधव हा जखमी झाला आहे.