राजगडमधील गावांसाठी उद्या आरक्षण सोडत

वेल्हे, ता. ९ ः राजगड तालुक्यातील ६६ ग्रामपंचायतीच्या सन २०२५ ते २०३० या कालावधीसाठी सरपंच पदाच्या आरक्षणाची सोडत शुक्रवारी (ता. ११) दुपारी १२ वाजता पंचायत समिती कार्यालयातील सभागृहात काढण्यात येणार असल्याची माहिती तहसीलदार निवास ढाणे यांनी दिली आहे. तालुक्यातील एकूण ७१ ग्रामपंचायतींपैकी जिल्हाधिकारी कार्यालयामध्ये फेब्रुवारी महिन्यात वडगाव झांजे, सुरवड, भट्टी वाघदरा, आसनी दामगुडा, मंजाई आसनी या पाच ग्रामपंचायतींच्या सरपंच पदाची आरक्षण सोडत जाहीर झाली आहे. उरलेल्या ६६ ग्रामपंचायतीच्या सरपंच पदाची आरक्षण सोडत शुक्रवारी दुपारी १२ वाजण्याच्या सुमारास काढण्यात येणार आहे. तालुक्यातील सर्व पक्षप्रमुखांनी, तसेच सरपंच, ग्रामपंचायत सदस्यांनी नागरिकांनी या ठिकाणी उपस्थित राहण्याचे आवाहन तहसीलदार ढाणे यांनी केले आहे.