राजगड किल्लाची वाट बिकट

वेल्हे, ता. १४ : स्वराज्याची पहिली राजधानी राहिलेल्या किल्ले राजगड (ता. राजगड )कडे जाणाऱ्या चारही रस्ता मार्गांची मोठ्या प्रमाणात दुरवस्था झाल्याने स्थानिक नागरिकांसह गडावर येणाऱ्या हजारो पर्यटकांचे मोठे हाल होत असल्याने या रस्त्यांवरील खड्डे तत्काळ बुजविण्याची मागणी नागरिकांकडून होत आहे.

युनेस्कोच्या २०२४-२५ वर्षाच्या यादीत छत्रपती शिवरायांच्या १२ किल्ल्यांचा नुकताच समावेश करण्यात आला आहे. यामध्ये छत्रपती शिवाजी महाराजांची २५ वर्षांपेक्षा अधिक काळ पहिली राजधानी राहिलेल्या राजगड किल्ल्याचा समावेश झाल्याने गडावर महाराष्ट्रासह परराज्यातून तसेच परदेशातून येणाऱ्या पर्यटकांची संख्या मोठ्या प्रमाणात वाढली आहे. मात्र, गडाकडे जाणाऱ्या मार्गासनी- साखर- वाजेघर ते पाल बुद्रूक, तसेच साखर ते गुंजवणे व खरीव फाटा ते- वाजेघरपर्यंत कोदवडी फाटा ते चिरमोडी या चारही मार्गांची मोठ्या प्रमाणात दुरवस्था झाली आहे. रस्त्यांच्या कडेला साइडपट्या, गटार व्यवस्था नसल्याने मोठ्या प्रमाणात पाणी रस्त्यावर येत आहे. काही ठिकाणी पाच ते सहा फुटाचे लांब व दोन ते तीन फुटापर्यंत खोल मोठे खड्डे पडल्याने स्थानिक नागरिकांसह गडावर येणाऱ्या हजारो पर्यटकांचे मोठ्या प्रमाणात हाल होत आहेत. स्थानिक नागरिकांना नेहमीचा रस्ता असल्यामुळे स्थानिक सावधगिरीने वाहने चालवत कसेबसे या रस्त्यांवरून प्रवास करीत आहेत; मात्र पर्यटकांना या रस्त्याचा अंदाज नसल्याने रात्रीच्या वेळी खड्ड्यात पडून अनेक दुचाकीस्वार तसेच साइडपट्ट्या नसल्याने अनेक चारचाकी गाड्यांचे छोटे-मोठे अपघात नेहमीच या परिसरामध्ये होत आहेत.

खड्डे बुजविण्यासाठी सार्वजनिक बांधकाम विभागास वारंवार सूचना देऊनही खड्डे बुजविले जात नाही तर स्थानिकांच्या जमिनी विकत घेतलेल्या विकासकांकडून डोंगराचे मोठ्या प्रमाणात उत्खनन केले गेल्याने अनेक ठिकाणची माती रस्त्यावर वाहत येऊन रस्ता बंद होण्याच्या घटना वारंवार घडत आहेत.
- गुलाब रसाळ, सरपंच, गुंजवणे ग्रामपंचायत

किल्ले राजगडाकडे येणाऱ्या रस्त्यांचे रुंदीकरण महत्त्वाचे असून समोरासमोर दोन गाड्या आल्यास मोठ्या प्रमाणात कसरत करावी लागत असून रस्त्याच्या खाली उतरण्यास जागा नसल्याने अनेक ठिकाणी अपघात होत आहेत.
- सरपंच शंकरराव रेणुसे, सरपंच, लव्ही बुद्रुक ग्रुप ग्रामपंचायतचे

या रस्त्यांच्या दुरुस्ती संदर्भात ठेकेदारास लेखी पत्र देण्यात आले असून रस्ता सुस्थितीत नाही झाल्यास संबंधित ठेकेदारावर कारवाई करण्यात येईल.
- अतिश मोहिते, शाखा अभियंता, सार्वजनिक बांधकाम विभाग