पुन्हा लेखी आश्वासन, आतातरी कारवाई होणार का?

वेल्हे, ता. १४ : पूर्वी केलेल्या उपोषणावेळी लेखी आश्वासन मिळाले कारवाई मात्र झाली नाही. गुरुवारी (ता.१४) त्याच मागणीसाठी उपोषण झाले पुन्हा लेखी आश्वासन मिळाले आता तरी कारवाई होणार का, की उपोषणकर्त्याला पुन्हा उपोषण करावे लागणार, असा सवाल उपोषणकर्त्याने केला आहे.
वेल्हे (ता.राजगड) येथील शासकीय धान्य गोदामा समोरील असलेल्या सरकारी गट क्रमांक ५४ मध्ये अतिक्रमणाबाबत सार्वजनिक बांधकाम विभाग व तहसील कार्यालय यांना वेळोवेळी निवेदन देऊनही कार्यवाही न झाल्याने १२ एप्रिल २०२५ रोजी येथील ग्रामस्थ संजय प्रभाकर पवार यांनी उपोषण केले होते. त्यावेळी तहसीलदारांनी सूचना दिल्यानंतर सार्वजनिक बांधकाम विभागाचे अधिकारी यांनी गटाची मोजणी करून तत्काळ अतिक्रमणावर कारवाई करण्यात येईल, असे लेखी आश्वासन दिल्यानंतर उपोषणकर्ते पवार यांनी उपोषण मागे घेतले होते. दरम्यान, या गटामध्ये अतिक्रमण न काढल्यामुळे त्या गटातच अधिकचे अतिक्रमण नव्याने सुरू झाले असून या बाबींकडे प्रशासन गांभीर्याने लक्ष देत नसल्याने संजय पवार यांनी पुन्हा दुसऱ्यांदा गुरुवारी (ता.१४) उपोषणाला बसले. याही वेळी राजगड तालुक्याचे सार्वजनिक बांधकाम विभागाचे उपअभियंता महेश मोकाशी यांनी इतर संबंधित प्रशासनासोबत चर्चा केल्यानुसार २१ दिवसांच्या आत वेल्हे नसरापूर रस्ता राज्यमार्ग १०६ रस्त्यालगत असलेल्या शासकीय गोडाऊन समोरील अतिक्रमण काढण्यात येईल, असे आश्वासन दिले आहे.

कोट:-
शासकीय जागेतील धान्य गोदाम गट क्रमांक ५४ या समोरील बेकायदेशीर अतिक्रमणाबाबत दोनदा उपोषण केले आहे. २१ दिवसापर्यंत कार्यवाही न झाल्यास जिल्हाधिकारी कार्यालयासमोर आमरण उपोषण करणार आहे.

संजय पवार, उपोषणकर्ते, वेल्हे

वेल्हे तहसीलदार, पोलिस स्टेशन,यांच्या सोबत झालेल्या बैठकीतील चर्चेनुसार शासकीय गोडाऊन समोरील अतिक्रमण २१ दिवसांपर्यंत काढण्यात येणार आहे.

-महेश मोकाशी, उप अभियंता, सार्वजनिक बांधकाम विभाग राजगड