विजेच्या धक्क्याने केळदला वासराचा मृत्यू

वेल्हे, ता.१० : दुर्गम केळद (ता.राजगड) येथे विजेच्या तुटलेल्या तारेचा धक्का लागून वासराचा मृत्यू झाल्याची घटना सोमवारी (ता. १०) सकाळी साडेदहाच्या सुमारास घडली. सुदैवाने शेतकरी व इतर जनावरे बचावल्याची माहिती माजी सरपंच रमेश शिंदे यांनी दिली.
याबाबत अधिक माहिती देताना शिंदे म्हणाले, केळद येथील जननी माता मंदिराच्यावरील बाजूस शंकर यशवंत शिंदे हे शेतकरी वासरासह, बैल इतर जनावरे चारण्यासाठी गेले असता तुटलेल्या विजेच्या तारेचा धक्का लागून वासराचा मृत्यू झाला. सुदैवाने वासरास विजेचा धक्का लागल्याचे जाणवल्याने शेतकऱ्यांनी इतर शेतकऱ्यांना जनावरांना बाजूला केले. याबाबत तत्काळ पंचनामा करून शेतकऱ्यास मदत मिळावी.
याबाबत महावितरणच्या कनिष्ठ अभियंता पूनम थोरवे म्हणाल्या की, घटनेची माहिती मिळताच वरिष्ठ तंत्रज्ञ सूर्यकांत शिंदे, वीजतंत्री दशरथ नाक्ती, राजू खोपडे, मारुती भुरुक, यांनी घटनास्थळी धाव घेत येथील विद्युत पुरवठा बंद केला व तुटलेली तार जोडण्यात आली.