‘भोर’मधील ‘जल जीवन’च्या कामांच्या चौकशीची मागणी

वेल्हे, ता. ७ : भोर विधानसभा मतदारसंघातील भोर, मुळशी व राजगड या तालुक्यात जल जीवन मिशनअंतर्गत अनेक पाणी पुरवठा योजनांची कामे अपूर्ण व निकृष्ट दर्जाची झाली आहेत. या कामांची चौकशी करण्याची मागणी आमदार शंकर मांडेकर यांनी जिल्हा परिषदेचे मुख्य कार्यकारी अधिकारी गजानन पाटील यांच्याकडे केली.
या निवेदनात म्हटले आहे की, भोर, मुळशी, राजगड तालुक्यातील विविध गावांमध्ये जल जीवन मिशन या योजनेअंतर्गत शेकडो पाणीपुरवठा योजना मंजूर व सुरू केलेल्या आहेत. सदरपैकी काही योजना पूर्ण झाल्याचा उल्लेख असला, तरी प्रत्यक्षात नागरिकांना पाणीपुरवठा होत नाही. तसेच, अनेक कामे अपूर्ण अवस्थेत प्रलंबित आहेत. काही ठिकाणी कामे पूर्ण न होता ठेकेदारांना जादा बिलांचे देयक अदा झाली आहेत. काही कामांमध्ये निकृष्ट दर्जा, अनियमितता, प्रशासकीय नियमांचे उल्लंघन झाल्याची दिसून येत आहे. परिणामी संबंधित नागरिकांना अपेक्षित पाणीपुरवठा मिळत नाही. या योजनांची सखोल चौकशी करून अपूर्ण कामे पूर्ण करण्यास ठोस निर्देश द्यावेत. तसेच, निकृष्ट व अनियमित कामांवर दंडात्मक कारवाई करावी आणि जादा देयक व अनियमितता सिद्ध झाल्यास संबंधित अधिकारी व ठेकेदारांविरुद्ध कारवाई करावी.
तसेच, नागपूरच्या हिवाळी अधिवेशनात याबाबतची मागणी मुख्यमंत्री देवेंद्र फडणवीस, उपमुख्यमंत्री अजित पवार, पाणीपुरवठा व स्वच्छता मंत्री गुलाबराव पाटील यांच्याकडे करणार असल्याचे आमदार मांडेकर यांनी सांगितले.