कृषिपंपाच्या केबल चोरीने इंदापुरातील शेतकरी हैराण

वालचंदनगर, ता. ३ : इंदापूर तालुक्याच्या पश्‍चिम भागातील नीरा नदीकाठचे शेतकरी विद्युत पंपाच्या केबल चोरीमुळे हैराण झाले असून, शेतकऱ्यांना आर्थिक भुर्दंड बसत आहे.
इंदापूर तालुक्याच्या पश्‍चिम भागातील शेतकऱ्यांसाठी नीरा नदी वरदान ठरली आहे. या भागातील रणगाव, निमसाखर, वालचंदनगर, कळंब परीसरातील अनेक शेतकऱ्यांची नीरा नदीवरती विद्युत पंप आहेत. शेतकऱ्यांनी पाइपलाइनद्वारे नीरा नदीचे पाणी निमसाखर, रणगाव, कळंब, वालचंदनगर परिसरामध्ये आणले आहे. शेतकऱ्यांचे नीरा नदीकाठी विद्युत पंप आहेत. त्यापासून ५० ते ६० मीटर अंतरावरती विद्युत पंप चालू करण्यासाठीचा पॅनेल बॉक्स बसवला आहे. पॅनेल बॉक्स ते विद्युत पंपापर्यंत विद्युत केबल टाकलेल्या आहेत. चोरट्यांनी विद्युत पंपाच्या केबल चोरण्याचा सपाटा लावला आहे. चोरीनंतर चोरटे केबलमधील तांब्याच्या तारा काढून विकत आहेत. या परीसरातील सुमारे २२ शेतकऱ्यांच्या केबलच्या चोरी झाल्या. त्यामध्ये संतोष गायकवाड, विजय गायकवाड, शरद गायकवाड, पोपट गायकवाड, सुनील गायकवाड, पांडुरंग गायकवाड, राहुल हुंबे, विलास गायकवाड यांच्या विद्युत पंपाचा समावेश आहे.
यासंदर्भात वालचंदनगर सरपंच व शेतकरी संतोष गायकवाड यांनी सांगितले की, एका शेतकऱ्याची एकावेळी सुमारे ६० मीटर केबलची चोरी होत आहे. आतापर्यंत किमान दोन वेळा केबलची चोरी झाली असून, शेतकऱ्यांना ५ ते १० हजार रुपयांचा आर्थिक फटका बसला असून, पिकांना पाणी देण्यास विलंब होत आहे. पोलिसांनी तातडीने तपास करून चोरट्यांना जेरबंद करण्याची मागणी केली.