अशोक पाटील ब वर्गातून विजयी

वालचंदनगर, ता.२० : भवानीनगर (ता.इंदापूर) येथील श्री छत्रपती सहकारी साखर कारखान्याच्या पंचवार्षिक निवडणूकीमध्ये ‘ब’ वर्गातून श्री जयभवानीमाता पॅनेलचे उमेदवार अशोक पाटील विजयी झाले. त्यांना २६० मते मिळाली.
श्री छत्रपती सहकारी साखर कारखान्याच्या पंचवार्षिक निवडणूकीच्या निकालाची मतमोजणी सोमवारी (ता.१९) सकाळी ९ वाजता सुरू झाली होती. मतमोजणीसाठी ७६ बुथवरील पेट्यामधील मते मोजण्याचे काम सुरु आहे. यासाठी ३८ टेबल ची व्यवस्था करण्यात आली असून दोन फेऱ्यामध्ये मतमोजणी पूर्ण होणार आहे. पहिली फेरी रात्री दहाच्या सुमारास संपली. यामध्ये श्री जय भवानीमाता पॅनेलच्या उमेदवारांनी श्री छत्रपती बचाव पॅनेलच्या उमेदवारावर सुमारे दोन ते अडीच हजार मतांनी आघाडी घेतली होती. रात्री अकरा वाजता दुसऱ्या फेरीच्या मतमोजणीला सुरवात झाली. पहाटे तीन वाजेपर्यंत दुसरी फेरी मते मोजुन अंतिम निकाल जाहीर होणार असल्याची माहिती निवडणूक निर्णय अधिकारी वैभव यांनी दिली.
दरम्यान, सत्यजित सपकळ यांनी उमेदवारी अर्ज माघारी घेण्याच्या दुसऱ्या दिवशी अशोक पाटील यांना पाठिंबा देवून पाटील यांचा प्रचार केला असल्यामुळे अशोक पाटील यांचा विजय निश्‍चित मानला जात होता. रात्री बारा वाजता मतमोजणी केंद्रावरती नागरिकांनी निवडणूकीचा निकाल ऐकण्यासाठी गर्दी केली होती.

05084