उपमुख्यमंत्री पवार यांचा वाढदिवस विविध उपक्रमांनी साजरा

वालचंदनगर, ता. २४ : उपमुख्यमंत्री अजित पवार यांचा वाढदिवस सामाजिक व शेतकरी हिताचे उपक्रम राबवून साजरा करण्यात आला असल्याची माहिती पुणे जिल्हा राष्ट्रवादी काँग्रेस पक्षाचे जिल्हा अध्यक्ष प्रदीप गारटकर यांनी दिली.
राष्ट्रवादी काँग्रेस पक्षाचे राष्ट्रीय अध्यक्ष व राज्याचे उपमुख्यमंत्री अजित पवार यांच्या वाढदिवसानिमित्त मंगळवारी (ता. २२ जुलै) जिल्ह्यामध्ये विविध कार्यक्रमांचे आयोजन करण्यात आले होते. जिल्हा परिषद प्राथमिक शाळा, माध्यमिक शाळेमध्ये शैक्षणिक साहित्य व शालेय उपयोगी वस्तुंचे वाटप करण्यात आले. तसेच, पावसाळी छत्र्याही देण्यात आल्या. आदिवासी शाळा, आश्रम शाळेतील मुलांनाही शैक्षणिक साहित्य व खाऊचे वाटप केले. जिल्ह्यात मोफत आरोग्य व कॅन्सर तपासणी शिबिराचे आयोजन केले होते. या वेळी झालेल्या नोकरी महोत्सवाचा जिल्ह्यातील तरुणांनी लाभ घेतला. याशिवाय, भजनी मंडळाला साहित्य भेट देण्यात आले. शेतकऱ्यांसाठी ५० टक्के सवलतीच्या दरात औषध फवारणीचा बॅटरीवरील पंप व मिल्कींग मशिन देण्यात आले. होम मिनिस्टर कार्यक्रमासह देशी गाईसाठी चारा वाटप, महिला सक्षमीकरण मेळावा, युवा संकल्प शिबिर, वृक्षदिंडी व वृक्षारोपण, रक्तदान शिबिर आदी उपक्रम राबविण्यात आल्याची माहिती जिल्हाध्यक्ष गारटकर यांनी दिली.