वशीकरणासाठी महिलेवर जादूटोणा; एकावर गुन्हा

वालचंदनगर, ता. २६ : इंदापूर तालुक्यातील वालचंदनगर (ता.इंदापूर) जवळील औरंगाबाद डिस्टिलरी कंपनीमधील कर्मचाऱ्याने महिलेला वशीकरण करण्यासाठी जादूटोणा केल्याप्रकरणी वालचंदनगर पोलिसांनी कंपनीतील कर्मचाऱ्यावर गुन्हा दाखल केला आहे.
याप्रकरणी पोलिसांनी प्रशांत अंबिके (रा. वालचंदनगर) याच्यावर महाराष्ट्र नरबळी, अमानुष अनिष्ट, अघोरी प्रथा व जादूटोणा प्रतिबंध अधिनियमानुसार गुन्हा दाखल केला आहे. वालचंदनगर पोलिसांनी दिलेल्या माहितीनुसार वालचंदनगर जवळील औरंगाबाद डिस्टिलरी कंपनीमध्ये राज्य उत्पादन शुल्क विभागाची ३१ वर्षांची महिला अधिकारी शासनाच्या कामासाठी कार्यरत आहे. १० जुलै ते ५ ऑगस्ट २०२५ दरम्यान अंबिके याने महिलेच्या पिण्याच्या पाण्याच्या बाटलीमध्ये राखेसारखा पांढरा अंगारा टाकत होता. तसेच कार्यालयातील टेबल, खुर्चीवर ही राखेचा अंगारा टाकून जादूटोणा करीत होता. संबंधित महिलेवर जादूटोणा व वशीकरण करून संबंध निर्माण करण्याचा प्रयत्न केला. संबंधित महिला कार्यालयाच्या बाहेर गेल्यानंतर अंबिके राखेसारखा अंगारा पाण्याच्या बाटलीमध्ये मिसळत होता. संबंधित महिलेला संशय आल्यानंतर तिने कार्यालयाच्या बाहेर जाण्यापूर्वी मोबाइलचे व्हिडिओ रेकॉडिंग सुरू ठेवल्यामुळे जादूटोणाच प्रकार उघडकीस आल्याचे वालचंदनगरचे सहायक पोलिस निरीक्षक राजकुमार डुणगे यांनी सांगितले.