‘छत्रपती’च्या कामगारांना १० टक्के वेतनवाढ

वालचंदनगर, ता. ४ : भवानीनगर (ता.इंदापूर) येथील श्री छत्रपती सहकारी साखर कारखान्याच्या संचालक मंडळाने कामगारांना त्रिपक्षीय समितीच्या करारानुसार १० टक्के वेतनवाढ दिली आहे. वेतनवाढीचा पहिला पगार गुरुवार (ता.५) कामगारांच्या खात्यामध्ये जमा करण्यात आला. वेतनवाढ देणारा छत्रपती राज्यातील पहिला सहकारी साखर कारखाना ठरला असून छत्रपती च्या कामगारांनी फटाके फोडून, गुलाब उधळत पेढे वाटून जल्लोष केला.
महाराष्ट्रातील साखर कारखान्यांमधील कामगारांच्या मागण्यासाठी शासनाने त्रिपक्षीय समिती नियुक्त केली होती. समितीच्या २३ जुलै २०२५ रोजी झालेल्या बैठकीमध्ये एक एप्रिल २०२४ पासून कारखान्यातील अधिकारी व कामगार यांचे मूळ पगार, महागाई व स्थिर भत्ता मिळून मिळणाऱ्या एकूण पगारावर १० टक्के पगारवाढ व सोयी-सुविधा देण्याचे मान्य करून करार करण्यात आला होता. या कराराची अंमलबजावणी कारखान्यांनी केल्यानंतर कामगारांना वेतनवाढ मिळणार होती. भवानीनगरच्या श्री छत्रपती सहकारी साखर कारखान्यातील शुगर वर्कर्स युनियने छत्रपतीच्या संचालक मंडळास त्रिपक्षीय समितीच्या कराराची अमंलबजावणी करण्याची विनंती गेल्या महिन्यामध्ये केल्यानंतर संचालक मंडळाने कारखान्यातील कामगारांना १० टक्के वेतनवाढ देण्यास तत्वतःमान्यता दिली होती.
दरम्यान, कामगारांनी कारखान्याचे अध्यक्ष पृथ्वीराज जाचक व उपाध्यक्ष कैलास गावडे यांच्यासह संचालक मंडळ, कार्यकारी संचालक अशोक जाधव, हनुमंत करवर यांचे अभिनंदन केले.

यासंदर्भात श्री छत्रपती कारखान्याचे अध्यक्ष कारखान्याचे अध्यक्ष पृथ्वीराज जाचक व उपाध्यक्ष कैलास गावडे यांनी सांगितले की, कारखान्याच्या चिमणीतून निघणारा धूर व सभासद व कामगारांच्या घराच्या चुलीतून निघणारा धूर एकच असतो. कारखाना चालला तर कामगार व सभासदांचा प्रपंच चालणार आहे. कामगार व सभासद एकाच रथाची दोन चाके आहेत.

संचालक मंडळाचा ऐतिहासिक निर्णय
श्री छत्रपती कारखान्याच्या संचालक मंडळाने कामगारांना दहा टक्के पगार वाढ देण्याचा निर्णय ऐतिहासिक आहे. त्रिपक्षीय समितीच्या कराराची अंलबजावणी करून पगारवाढ देणारा छत्रपती राज्यातील पहिला कारखाना ठरला आहे. कारखान्याला अडचणीमधून बाहेर काढण्यासाठी सर्व कामगारांना खांद्याला खांदा देवून, काम करणार असल्याचे कामगार नेते युवराज रणवरे यांनी सांगितले.

05448