बेलवडी परिसरात उत्पादनात घट

वालचंदनगर, ता. १ : बेलवाडी परिसरात सततच्या पडणाऱ्या पावसामुळे झेंडू उत्पादकांचे नुकसान झाले आहे. यामुळे उत्पादनात घट झाली आहे. छोट्या शेतकऱ्यांनी बुधवारी (ता.१) झेंडू व्यापाऱ्यांना ठोक भावामध्ये विकण्याऐवजी ग्राहकांना किरकोळ विक्री केली. तसेच झेंडूच्या फुलांचे हार करून विक्रीवर भर दिला.

सप्टेंबर महिन्यामध्ये इंदापूर तालुक्यामध्ये पावसाने दमदार हजेरी लावली होती. दसऱ्याला झेंडूच्या फुलाला विक्रमी मागणी असते. सततच्या पावसामुळे तसेच शेतामध्ये चिखल झाल्यामुळे शेतकऱ्यांना झेंडूची तोडणी करणे शक्य नसल्यामुळे शेतकऱ्यांचे नुकसान झाले आहे. झेंडूच्या झाडांना फुलांचे ओझे सहन न झाल्यामुळे अनेक झेंडूची झाडे पडली. तसेच पावसामुळे करपा रोगाचा प्रार्दुभाव वाढला होता. पावसामध्ये औषध फवारणी औषधफवारणी करताना अनेक अडचणी आल्यामुळे करपा रोगाचा प्रार्दुभाव वाढत गेल्यामुळे शेतकऱ्यांचे उत्पादन घटले आहे.

अर्धा एकर क्षेत्रात झेंडूची १२०० रोपे लावली होती. सततच्या पावसामुळे उत्पादनामध्ये निम्याने घट झाली आहे. कमीत कमी एक टन उत्पादन निघणे अपेक्षीत होते. मात्र प्रत्यक्षात चारशे ते पाचशे किलो झेंडूचे उत्पादन निघाले आहे.
- संपत गोरे, शेतकरी, बेलवाडी (ता.इंदापूर)