गूढ आवाज, हादऱ्याने पुरंदरमध्ये भीतीचे वातावरण

वाल्हे, ता. ७ : पुरंदर तालुक्यातील काही गावांमध्ये मंगळवारी (ता. ७) दुपारी २ वाजून १४ मिनिटांनी भूगर्भात गूढ आवाज आल्याची घटना घडली आहे.
अचानक झालेल्या आवाज व हादऱ्यामुळे हा भूकंप असावा, असा ग्रामस्थांचा समज झाला होता. दरम्यान, या आवाजाचे कारण अद्याप स्पष्ट झाले नसून, ग्रामस्थांमध्ये मात्र भीतीचे वातावरण आहे.
वाल्ह्यासह नीरा, आडाचीवाडी, वागदरवाडी, सुकलवाडी, पिंगोरी, दौंडज, हरणी, जेऊर, मांडकी, राख, पिसुर्टी आदी परिसरात हा गूढ आवाज व सौम्य धक्का जाणवला. आज वाल्हे येथील आठवडे बाजार असल्याने दुपारी अचानक झालेल्या आवाज व हादऱ्यामुळे विक्रेत्यांसह ग्राहक भयभीत झाले. दरम्यान याबाबत जेजुरीचे पोलिस निरीक्षक दीपक वाकचौरे यांच्याशी संपर्क साधला असता, भूगर्भातील गूढ आवाज जेजुरी, वाल्हे, नीरा, सासवड
परिसरातील बहुतांश गावांमध्ये झाल्याचे समजत आहे. ग्रामस्थांनी घाबरून जाऊ नये, सुरक्षिततेचा उपाय म्हणून ग्रामस्थांनी पक्क्या घरात थांबावे.