पिंगोरीच्या यात्रेत छबिन्याने रंगत

वाल्हे, ता. १२ : पिंगोरी (ता. पुरंदर) येथील ग्रामदैवत वाघेश्वरी देवीचा दोन दिवसीय यात्रा उत्सव मोठ्या उत्साहात संपन्न झाला. पारंपारिक वारसा जपलेल्या या यात्रा उत्सवाला गावातील नागरिकांचा मोठा प्रतिसाद मिळाला. धार्मिक, सांस्कृतिक कार्यक्रमांसह शाही छबिना, महाप्रसाद व लावण्यांचा बहारदार कार्यक्रमाने रंगत आणली. मंदिरात फुलांची सजावट, आकर्षक विद्युत रोषणाई केल्याने मंदिर परिसर उजळून निघाला आहे.
शिंदे सरदारांची कुलस्वामींनी असलेल्या देवीच्या या यात्रेला चारशे वर्षांपेक्षा जास्त वर्षाची परंपरा आहे. त्यामुळे या गावातील कामानिमित्त बाहेर गेलेले लोक व पुणे आणि सातारा जिल्ह्यातील अनेक भाविक गर्दी करीत असतात. या गावाला सैनिकी परंपरा आहे. गावातील अनेक तरुण आजही लष्करात सेवा बजावत आहेत. यात्रेनिमित्त अनेक सैनिकही गावाकडे येत असतात.
येथील ग्रामदैवत श्री वाघेश्वरी माता यांचा यात्रा उत्सव मोठ्या भक्तीभावात झाला. श्री वाघेश्वरी देवीच्या यात्रा उत्सवानिमित्त यात्रेच्या
पहिल्या दिवशी सकाळी उत्सवमूर्तींना स्नान व महापूजा केली. मंदिर परिसरामध्ये दिवसभर विविध धार्मिक कार्यक्रम सुरू होते. यात्रेनिमित्त मंदिर परिसरामध्ये नारळ, पेढे विक्रीची दुकाने थाटली होती. सकाळपासूनच मंदिर परिसरामध्ये भाविक भक्तांनी दर्शनासाठी रांगा लावल्या होत्या. यावेळी ‘वाघेश्वरी मातेच्या नावाने चांगभलं’च्या जयघोषाने परिसर दुमदुमून गेला होता. महाआरतीनंतर रात्री अकरानंतर उत्सवमूर्तीच्या पालखीची ग्राम प्रदक्षिणा झाली. त्यानंतर पारंपारिक ढोल-ताशा व सनईच्या निनादात रंगलेल्या छबिन्यात तरुणवर्ग मोठ्या उत्साहात नाचत होते. ‘वाघेश्वरी मातेच्या नावानं चांगभलं’च्या जयघोषाने संपूर्ण छबिना रंगून गेला होता. रात्रीच्या वेळी ग्रामस्थांसह पै-पाहुण्यांनी मोठ्या प्रमाणावर गर्दी केली होती. रात्रीच्या वेळी गावातील
महिलांसह माहेरवाशींनीची देवीच्या दर्शनासाठी मोठी गर्दी केली.
सोमवारी सकाळी दहा ते दुपारी तीन वाजेपर्यंत हनुमंतराव देवकाते यांचा लोकनाट्य तमाशाचा कार्यक्रम झाला. मंगळवारी
वाघेश्वरी तरुण विकास मित्र मंडळाच्या वतीने रात्री पूजा नाशिककर यांचा ‘दिलबरा तुझ्यासाठी’, तर बुधवारी सुवर्णा काळे यांचा ‘तुझ्या साठी काय पण’ या बहारदार मनोरंजनाच्या कार्यक्रमाचे आयोजन केले आहे.