वाल्ह्यात बॅंक ऑफ महाराष्ट्रचे ऑनलाइन सर्व्हर ठप्प

वाल्हे, ता. १६ : वाल्हे (ता. पुरंदर) येथील बॅंक ऑफ महाराष्ट्र शाखेतील गेल्या सात दिवसांपासून ऑनलाइन सर्व्हरमध्ये तांत्रिक अडचण निर्माण झाल्याने बॅंकेचे कामकाज बंद आहे. यामुळे अनेक व्यवहार ठप्प झाले असल्याने बॅंक खाते धारकांची तारांबळ उडाली आहे. स्वत:चे पैसे असून देखील बॅंकेत खेट्या माराव्या लागत असल्याने बॅंक चालू व सर्व्हर बंद अशी अवस्था झाली असल्याने खातेधारक संताप व्यक्त करीत आहेत.
गुरुवारपासून (ता. ८) येथील बॅंक ऑफ महाराष्ट्र शाखेत सर्व्हर बंद असल्याच्या कारणावरून बॅंकेतील व्यवहार ठप्प झाले आहेत. गेले सात दिवसांपासून खातेदार बॅंकेत येऊन वाट पाहून काम न होताच परत जात आहेत. या शाखेमध्ये वाल्ह्यासह आडाचीवाडी, सुकलवाडी, वागदरवाडी, राख, दौंडज, पिंगोरी, हरणी, मांडकी, जेऊर, पिसुर्टी आदी गावांतील बॅंक खातेदारांची संख्या मोठी असल्याने बॅंकेमध्ये प्रचंड गर्दी आणि कामकाज ठप्प अशी अवस्था आहे. खाते धारकांचे आरटीजीएस व नेट बॅकिंगद्वारे ट्रान्झॅक्शन होत नसल्याने बॅंकेत पैसे असून देखील वेळप्रसंगी पैसे पाठवता येत नसल्याने अनेक व्यापारी, शेतकरी व महिलांचा खोळंबा झाल्याचे खातेदार दीपक कुमठेकर, स्वप्नील भुजबळ, जितेंद्र पवार आदींसह बॅंक खातेदारांनी बॅंकेच्या कामकाजावर तीव्र शब्दात संताप व्यक्त केला.
याबाबत बॅंकेचे शाखाप्रमुख विशाल जाधव यांच्याशी संपर्क साधला असता म्हणाले की, नेटवर्कमध्ये काही समस्या निर्माण झाल्याने व विजेच्या कमी अधिक दाबामुळे सिस्टीमला अडथळा येत आहे. मात्र ग्राहकांची गैरसोय टाळण्यासाठी नीरा-जेजुरी येथील शाखांमधून मोठ्या रकमेचे ट्रान्झॅक्शन केले जात आहेत. ग्राहकांच्या सुविधेबाबत वरिष्ठांशी संपर्क साधल्याचे त्यांनी सांगितले.