वाल्हेत त्रुटींबाबत चर्चा

वाल्हे, ता. २८ : वाल्हे (ता. पुरंदर) नजीक सुकलवाडी फाट्याशेजारी प्रांगणामध्ये ज्ञानेश्‍वर महाराज पालखी सोहळा २५ जूनला मुक्कामी असणार आहे. त्या पार्श्‍वभूमीवर पालखी सोहळा मुक्कामाची पूर्वतयारी म्हणून मंगळवारी (ता. २७) जिल्हाधिकारी जितेंद्र डुडी यांनी ज्ञानेश्‍वर महाराज संस्थानच्या विश्‍वस्तांसमवेत पाहणी केली. यावेळी त्यांनी त्रुटींबाबत संबंधित विभागांना तत्काळ अंमलबजावणी करण्यासंदर्भात आदेश दिले.
माउलींच्या पालखी सोहळ्यादरम्यान वाल्हे येथील पालखी तळावर भाविकांसाठी दर्शनबारी, दिंड्या आणि भाविकांना पालखीतळावर येण्याचा व बाहेर जाण्याचा मार्ग, रांगेतील दर्शन व्यवस्था, पालखी रथ येण्याचे मुख्य ठिकाण, बैठक व्यवस्था, नीरा स्नान दरम्यान जाणारा पर्यायी मार्ग आदींबाबत
डुडी यांनी माहिती घेतली. यावेळी यांच्या समवेत पोलिस अधीक्षक संदीप गिल, आळंदी देवस्थानचे प्रमुख विश्‍वस्त योगी निरंजन नाथ, पालखी सोहळा प्रमुख डॉ. भावार्थ देखणे, पालखी सोहळा मालक बाळासाहेब आरफळकर होते.
याप्रसंगी मारुती कोकाटे, पुरंदर उपविभागीय अधिकारी वर्षा लांडगे, उपविभागीय पोलिस अधिकारी तानाजी बरडे, तहसीलदार विक्रम राजपूत, नायब तहसीलदार सोनाली वाघ, दीपक वाकचौरे, स्वाती दहिवाल, ज्ञानेश्‍वर वीर, बाळकृष्ण मोरे, उपसरपंच सम्राज्ञी लंबाते, सागर भुजबळ, अमित पवार, मयूरी भुजबळ, तेजस दुर्गाडे, भारत भिसे, जयेंद्र सुळ आदींसह ग्रामस्थ मोठ्या संख्येने उपस्थित होते.
यावेळी सुकलवाडीचे सरपंच संदेश पवार, राहुल यादव यांनी पालखी सोहळ्यादरम्यान सोहळ्यातील वाहनांसाठी असलेल्या पर्यायी मार्गाच्या अपूर्ण कामाबाबत जिल्हाधिकाऱ्यांकडे तक्रार केली. यावेळी डुडी यांनी संबंधित विभागाच्या अधिकाऱ्यांना या मार्गाच्या कामाबाबत माहिती
घेऊन ते काम तत्काळ पूर्ण करण्याचे आदेश दिले. तसेच महेंद्र पवार यांनी वाल्हे महसुलचे समांतर पद्धतीने विभाजन करणे तर सागर भुजबळ, अमित पवार यांनी रेल्वे भुयारी मार्गाच्या दुतर्फा संरक्षण भिंत उभारणे, पुणे-पंढरपूर पालखी महामार्गावर वाल्हे पाणी टाकीशेजारी महामार्गावरील रस्ता खुला करणे, गावठाणमधील ओढ्यालगत संरक्षण भिंत उभारणे आदी कामांबाबतच जिल्हाधिकारी जितेंद्र डुडी यांच्याकडे निवेदने सादर केली.