वाल्ह्यात वटपौर्णिमा उत्साहात साजरी

वाल्हे, ता. १० : वाल्हे (ता. पुरंदर) येथील आद्यरामायणकार महर्षी वाल्मीकी समाधी परिसरामधील वटवृक्षाला मंगळवारी (ता. १०) वटपौर्णिेमेच्या निमित्ताने सुवासिनींनी वडाची पूजा करून सुताचा धागा बांधून पतीच्या दीर्घायुष्यासाठी साकडे घातले. काठापदराच्या साड्या, गजरा, सौभाग्यलंकारांचा साज लेवून महिलांनी पतीच्या दीर्घायुष्याची व साताजन्माच्या सोबतीची कामना केली. एकविसाव्या शतकात वावरत असलो तरी आई, आजी
सासू, सासू यांच्यासमवेत नव्या पिढीतील सुवासिनींसोबत नवविवाहितांनी देखील वटपौर्णिमेचे व्रत मनोभावे केले. हिंदू धर्मातील सण, प्रथा परंपरा या निसर्गाच्या संस्कृतीशी जोडल्या गेल्या आहेत. सकाळपासून सुवासिनींमध्ये
पूजेची लगबग सुरू झाली होती. वटपौर्णिमेनिमित्त चैतन्यमय असं वातावरण दिसून आले. साजश्रृंगार करून पारंपारिक वेशभूषेत हातामध्ये पूजेचे ताट घेऊन महिलांनी वडाच्या झाडाला सात फेऱ्या मारून वडाच्या झाडाची मनोभावे पूजा केली. आंबे, केळी, फुले, हळद-कुंकू साहित्याने वडाची विधीवत पूजा करत सुवासिनींनी जन्मोजन्मी हाच पती लाभो, अशी प्रार्थना केली करत विधिवत पूजा करून पारंपारिक पद्धतीने वटपौर्णिमा उत्साहात साजरी केली. परिसरात विविध ठिकाणी असलेल्या वडाच्या झाडांची पूजा करण्यासाठी महिलांनी गर्दी केली होती. वटवृक्षाची पूजा केल्यानंतर विविध ठिकाणच्या मंदिरांतही दर्शनासाठी महिलांनी गर्दी केली होती.