विजेच्या लंपडावामुळे वाल्हेकरांचा आक्रोश मोर्चा

वाल्हे, ता. १७ : वाल्हे (ता.पुरंदर) परिसरात वारंवार खंडित होणाऱ्या वीजपुरवठ्यामुळे ग्रामस्थांनी वाल्हे कार्यालयावर आक्रोश मोर्चा काढला व तीव्र संताप व्यक्त केला. गेल्या काही दिवसांपासून दिवस-दिवस वीजपुरवठा खंडित होण्याचे प्रमाण वाढल्याने ग्रामस्थांमध्ये रोष निर्माण झाला आहे. यावर त्वरित उपाययोजना करा या मागणीसाठी वाल्हेकर ग्रामस्थांनी सोमवारी (ता. १६) सकाळी महावितरण कार्यालयावर गावांतर्गत घोषणा देत आक्रोश मोर्चा काढला व महावितरणच्या भोंगळ कारभाराचा निषेध व्यक्त केला.
अनेक दिवसांपासून वाल्हे परिसरास होणारा वीजपुरवठा सातत्याने खंडित होत असल्याने ग्रामस्थांना मनस्ताप सहन करावा लागत आहे. वेळोवेळी मागणी करुनही वीजपुरवठा सुरळीत होत नसल्याने वाल्हेकर ग्रामस्थांनी महावितरणच्या भोंगळ कारभाराबाबत गावांतर्गत आक्रोश मोर्चा काढण्यात आला.
यामध्ये भाजपचे ओबीसी मोर्चाचे पश्चिम महाराष्ट्र संपर्क प्रमुख सचिन लंबाते, अॅड फत्तेसिंग पवार, सरपंच अतुल गायकवाड, माजी सभापती गिरीश पवार, शिवसेनेचे उपतालुका प्रमुख सागर भुजबळ, संभाजी पवार, रणसिंग पवार, ग्रामपंचायत सदस्य सागर भुजबळ, अमित पवार, तेजस दुर्गाडे, हरीश दुबळे, राजेंद्र लंबाते, राजेंद्र गायकवाड, राजेंद्र ढवळे, दीपक कुमठेकर आदींसह ग्रामस्थ मोठ्या संख्येने उपस्थित होते.

दरम्यान, गावांतर्गत निषेध फेरी झाल्यानंतर येथील महावितरण कार्यालयाला घेराव घालत ग्रामस्थांनी मनोगत व्यक्त करून महावितरणच्या भोंगळ कारभाराचा तीव्र शब्दात निषेध व्यक्त केला. यावेळी नीरा येथील उपकार्यकारी अभियंता आनंद पवार यांच्याशी संपर्क साधून लवकरात लवकर वीजपुरवठा सुरळीत न केल्यास तीव्र आंदोलनाचा इशारा देण्यात आला.

यावेळी ग्रामस्थांच्या वतीने महावितरणच्या सेवेबाबतच्या मागण्यांचे निवेदन वाल्हे महावितरणचे कनिष्ठ अभियंता श्रीकांत बोधले यांच्याकडे निवेदन देण्यात आले. यावेळी महावितरणचे रवींद्र सूर्यवंशी, रवींद्र माने, अमोल चव्हाण, जिजाबा डोंगरे, केदार पाटील, प्रवीण वाव्हळ, राहुल भुजबळ, दत्तात्रेय पवार आदी कर्मचारी उपस्थित होते.
दरम्यान, कनिष्ठ अभियंता बोधले यांनी संत ज्ञानेश्वर महाराज पालखी सोहळा वाल्हेतून पुढे मार्गस्थ झाल्यानंतर लवकरात लवकर वाल्हे परिसरातील वीजपुरवठा सुरळीत केला जाण्याबाबतचे लेखी आश्वासन आंदोलकांना दिले.

04698