वाल्हेत मोटारीच्या धडकेत दुचाकीस्वाराचा मृत्यू

वाल्हे, ता. ७ : पुणे- पंढरपूर पालखी महामार्गावरील वाल्हे (ता. पुरंदर) येथील नव्यानेच बांधलेल्या पुलावर सोमवारी (ता. ७) सायंकाळी जेजुरीहून निरेकडे जाणाऱ्या दुचाकीला चारचाकी गाडीची जोरदार धडक बसून झालेल्या अपघातात दुचाकीस्वार गंभीर जखमी झाला.
या अपघातामध्ये उल्लाउद्दीन खुदबुद्दीन सय्यद (वय ७५, रा. नीरा शिवतक्रार) अपघातात मृत झालेल्या ज्येष्ठ नागरिकाचे नाव आहे. या अपघाताची जेजुरी पोलिस ठाण्यात नोंद करण्यात आली आहे. याबाबत पोलिसांनी दिलेल्या माहितीनुसार उल्लाउद्दीन सय्यद हे आज सोमवरी (ता. ७) सायंकाळी साडेचारच्या सुमारास जेजुरीहून निरेकडे आपल्या घरी जात होते. त्यावेळी पाठीमागून आलेल्या भरधाव मोटारीने दुचाकीला जोरदार धडक दिली. या अपघातात सय्यद यांच्या डोक्याला गंभीर दुखापत झाली. दरम्यान, सय्यद यांच्या डोक्याला गंभीर दुखापत होऊन रक्तस्राव झाला असल्याने ग्रामस्थांच्या मदतीने पोलिसांनी तत्काळ त्यांना पुढील उपचारासाठी जेजुरी येथील शासकीय रूग्णालयात पाठविण्यात आले. मात्र, सय्यद यांचा उपचारापूर्वीच मृत्यू झाल्याचे डॉक्टरांनी घोषित केल्याचे हवालदार भाऊसाहेब भोंगळे यांनी
सांगितले. वाल्हे पोलिसांनी तातडीने अपघातस्थळी धाव घेऊन घटनेचा पंचनामा केला.

गतिरोधक व दिशादर्शक फलकांचा अभाव
पुणे- पंढरपूर पालखी महामार्गाच्या विस्तारीकरण दरम्यान वाल्हे परिसरामधील अनेक गावांचे रस्ते महामार्गाला जोडले आहेत. त्यामुळे येथे महामार्गावर सतत रहदारी गजबजलेली असते. अपघात झालेल्या ठिकाणी जोडरस्ते आहेतच, शिवाय मोठे वळणही आहे. मात्र, वळणमार्ग असल्याचा दिशादर्शक फलक नाही आणि गावात गतिरोधकही नाही. त्यामुळे वाहन चालकांना समोरून येणाऱ्या गाडीचा अंदाज येत नाही. परिणामी अपघाताला सामोरे जाण्याच्या घटना वाढत आहेत. विस्तारीकरणाच्या कामामध्ये महामार्गावर अनेक ठिकाणी दिशादर्शक फलकांचा अभाव असून, संबंधित विभागाने लक्ष देण्याची मागणी नागरिकांनी केली आहे.