दौंडजमध्ये ‘दिगंबरा-दिगंबरा’चा जयघोष

वाल्हे, ता. १० : ‘दिगंबरा दिगंबरा, श्रीपाद वल्लभ दिगंबरा’च्या नामघोषात दौंडज (ता. पुरंदर) येथील स्वामी समर्थ अनंत मठामध्ये श्री स्वामी समर्थांच्या पादुकांचे पूजन करून गुरुपौर्णिमेचा उत्सव भक्तिमय वातावरणात साजरा करण्यात आला. यावेळी मठामध्ये भक्तांची मांदियाळी पाहायला मिळाली.
याप्रसंगी मठातील मंदिर परिसराला विद्युत रोषणाईसह पाना-फुलांची सजावट केली होती. रोषणाई, पताका आणि पारंपरिक सजावटीमुळे परिसर भक्तिमय झाला होता. सुनीता अनंत पोतदार महाराजांच्या मार्गदर्शनाखाली विविध धार्मिक कार्यक्रम झाले. गुरुपौर्णिमेनिमित्त मंदिरात पहाटे पाच वाजता काकड आरती, सकाळी सात वाजता महाभिषेक, आठ वाजता श्री दत्त गायश्री व स्वामी गायश्री यज्ञ झाला. दहा ते बाराच्या दरम्यान शेकडो भाविकांच्या उपस्थितीत गुरुपूजन सोहळा पार पडला. त्यानंतर सर्वांनी स्वामींचा जयघोष केला. यावेळी स्वामी समर्थांच्या चरणी लीन झालेला दौंडज मठ भक्तीच्या तेजात न्हाऊन निघाला होता. दुपारी दमयंती महाराज माने यांचे प्रवचन आणि स्वामींचा आरती सोहळा झाला. यावेळी ‘दिगंबरा-दिगंबरा’च्या जयघोषाने परिसर दुमदुमला होता. दरम्यान, दिवसभर दौंडज येथील ज्ञानराज भजनी मंडळाच्या वतीने भजनाचा कार्यक्रम झाला. सायंकाळी ‘श्रीं’ची पालखी प्रदक्षिणा झाल्यानंतर शेजारती व सायंकाळी महाप्रसाद असे कार्यक्रम पार पडले. वाणेवाडी येथील भूषण बोत्रे व वडकी येथील शंकर मोडक यांच्या वतीने महाप्रसादाचे वाटप करण्यात आले. यावेळी प्रियांक भुजबळ यांनी पौराहित्य केले.