हरणीत शेतकऱ्याने अनुभवला बिबट्याचा थरार

वाल्हे, ता. २७ : हरणी (ता. पुरंदर) येथे वाल्हे- परिंचे रस्त्यालगत शनिवारी (ता. २६) सायंकाळी साडेपाचच्या सुमारास दबा धरून बसलेल्या बिबट्याने शेतकऱ्याच्या मागे अवघ्या पन्नास फुटांच्या अंतरावरून चाललेल्या कुत्र्यावर हल्ला करत त्याचा फडशा पाडला. या घटनेने परिसरात एकच खळबळ उडाली असून, शेतकऱ्यांमध्ये भीतीचे वातावरण निर्माण झाले आहे. शेतकऱ्यांनी बिबट्याचा बंदोबस्त करण्याची मागणी केली आहे.
महादेव पांडुरंग यादव हे शेतकरी शनिवारी सायंकाळी नेहमीप्रमाणे आपल्या जनावरांसह घरी परतत होते. त्यावेळी ते वाल्हे-परिंचे रस्त्याने चालत संतोष यादव यांच्या कंपनीजवळ आले असताना त्यांच्या मागून चालणाऱ्या कुत्र्याचा ओरडण्यास आवाज आला. त्यामुळे त्यांनी मागे वळून पाहिले असता त्यांच्या डोळ्यांदेखत बिबट्याने त्या कुत्र्यावर झडप घातली होती. त्यांनी घाबरून आरडाओरड केल्यावर बिबट्या कुत्र्याला घेऊन रस्त्यालगत असलेल्या उसाच्या शेजारील आंब्याच्या झाडाकडे धाव घेत पसार झाला.
दरम्यान, महादेव यादव यांनी आरडाओरडा केल्यानंतर शेजारील शेतात असलेले संजय यादव, चंद्रकांत यादव,
देविदास यादव यांच्यासह काही ग्रामस्थांनी घटनास्थळी धाव घेतली. त्यांनी परिसराची पाहणी केली असता आंब्याच्या झाडाच्या फांदीवर बिबट्याने संजय रामचंद्र यादव यांच्या मालकीच्या कुत्र्याचा गळ्याजवळील भाग फाडलेला दिसून आला. कुत्रा रक्ताच्या थारोळ्यात निपचित पडलेला होता.

कायमस्वरूपी उपाययोजना हवी
बिबट्या उसाच्या शेतात पळून गेला आहे. या घटनेमुळे परिसरात पुन्हा बिबट्या येण्याची शक्यता वर्तवली जात आहे. ग्रामस्थ व शेतकऱ्यांनी वनविभागाकडे बिबट्याचा कायमस्वरूपी बंदोबस्त करण्याची मागणी केली आहे. मागील काही महिन्यांपासून या भागात बिबट्याचा वावर वाढला आहे. वारंवार बिबट्याचे दर्शन होत आहे. जनावरांबरोबर शेतात जाणे धोकादायक झाले असून भीतीच्या छायेत शेतीकाम चालू आहे.

माझ्या व जनावरांच्या जिवाला काही इजा झाली नाही, हे नशीबच म्हणावं. अवघ्या पन्नास फुटांवरून बिबट्याने हल्ला केला. त्याचं लक्ष बहुधा कुत्र्यावर गेलं म्हणून आम्ही वाचलो.
- महादेव यादव, शेतकरी

हरणी येथील कुत्र्याच्या मानेकडील बाजूला वन्यप्राण्याने हल्ला करून मारल्याची माहिती समजली आहे. सदर बिबट्या रात्री पुन्हा शिकार करण्यासाठी येण्याची शक्यता आहे. त्यामुळे नागरिकांनी सतर्क राहावे, आदी खबरदारीच्या सूचना वनविभागाच्या कर्मचाऱ्यांनी ग्रामस्थांना दिल्या आहेत.
- राहुल रासकर, वनपाल