‘टायगर’ने रोखला बिबट्याचा हल्ला

वाल्हे, ता. २८ : इमानदार प्राणी म्हणून ओळखल्या जाणाऱ्या श्वानाने पुन्हा एकदा आपली निष्ठा सिद्ध केली. रविवारी हरणी(ता. पुरंदर) येथे घडलेल्या थरारक घटनेत ‘टायगर’ या पाळीव श्वानाने आपल्या मालकाचा आणि त्यांच्या जनावरांचा बिबट्यापासून जीव वाचवताना स्वत:चा जीव गमावला. या जिगरबाज टायगर श्वानाचे गावकऱ्यांकडून कौतुक केले जात आहे.
हरणी येथील महादेव मगर हे शेतकरी रविवारी (ता. २७) सायंकाळी नेहमीप्रमाणे येथील पिसरवाट शेतामधील गोठ्यामध्ये जनावरांसोबत झोपले होते. त्यांच्या शेजारी टायगर श्वानही नेहमीप्रमाणे झोपलेला होता. दरम्यान रात्री साडेबाराच्या सुमारास काहीतरी आवाज झाल्याने टायगर सावध झाला. त्याने गोठ्याच्या बाहेर झुडपात दबा धरुन बसलेला बिबट्या पाहिला. बिबट्याने मालकावर हल्ला करण्याचा प्रयत्न करतानाच टायगरने मालकाचे व शेजारील जनावरांचे प्राण वाचविण्यासाठी बिबट्याच्या दिशेने हल्ला चढविला. टायगरच्या धाडसामुळे महादेव मगर व त्यांच्या जनावरांचे प्राण वाचले. मात्र बिबट्याच्या संघर्षात टायगर गंभीर जखमी झाला. बिबट्या व टायगरच्या झटापटीने महादेव मगर हे जागे झाले. त्यावेळी अवघ्या काही अंतरावर त्यांनी आपल्या पाळीव श्वानावर हल्ला होत असल्याचे पाहून मदतीसाठी जिवाच्या आकांताने आरडाओरडा केला. त्यावेळी क्षणार्धात बिबट्या श्वानाला घेऊन अंधारामध्ये पसार झाला. महादेव मगर यांनी आरडाओरडा केल्यानंतर शेजारील काही ग्रामस्थांनी घटनास्थळी धाव घेतली. त्यांनी परिसराची पाहणी केली असता काही
अंतरावर शेतामध्ये टायगर श्वानाच्या गळ्याजवळ खोलवर जखमा झाल्या होत्या. रक्ताच्या थारोळ्यात त्याचा मृत्यू झाला. दरम्यान, या जिगरबाज श्वानाचे गावकऱ्यांकडून कौतुक केले जात आहे. सलग दुसऱ्या दिवशी बिबट्याने या परिसरामध्ये हल्ला केल्याने शेतकऱ्यांसह ग्रामस्थांमध्ये भितीचे वातावरण झाले आहे. या ठिकाणी तत्काळ वनविभागाने पिंजरा लावून या बिबट्याचा बंदोबस्त करावा, अशी मागणी महादेव मगर, महादेव यादव यांसह शेतकऱ्यांनी केली.
दरम्यान, महादेव मगर यांनी वनपाल राहुल रासकर यांच्याशी संपर्क साधून घटनेबाबत माहिती दिली. याबाबत रासकर यांनी नागरिकांनी सतर्क राहण्याचे आवाहन केले. लवकरच या परिसरात बिबट्याचा बंदोबस्त करण्यासाठी पिंजरा लावण्यात येणार असल्याचे सांगितले.