वाल्हे परिसरातील महिलांकडून वारूळाचे पूजन

वाल्हे, ता. २९ : श्रावण शुद्ध पंचमी अर्थात नागपंचमीचा सण वाल्हे (ता. पुरंदर) परिसरात पारंपरिक पद्धतीने साजरा झाला. यानिमित्त घरोघरी नागोबाचे चित्र चिकटवून नागपंचमीची विधिवत पूजा करण्यात आली. या सणामुळे परिसरात महिलांची लगबग होती.
तुरळक श्रावणसरींच्या वर्षावात खेळ आणि पारंपरिक गाणी म्हणत हा सण साजरा करण्यात आला. येथील आद्यरामायणकार महर्षी वाल्मीकी ऋषी मंदिराच्या प्रांगणातील औंदुबराच्या झाडाखालील प्राचीन काळातील नागशिल्पाची महिलांनी मनोभावे पूजा केली.
याप्रसंगी वाल्हे परिसरात शेतकऱ्यांचा मित्र आणि निसर्ग साखळीत महत्त्वाचा घटक असलेल्या नागदेवतेबद्दल कृतज्ञता व्यक्त करण्यात आली. महिलांनी नवीन अलंकार, वस्त्रे नेसून वारूळाला दूध, लाह्या अर्पण करून नागदेवतेची पूजा केली. यानिमित्ताने दिवसभर धार्मिक व पारंपरिक खेळांची मेजवानी होती. दरम्यान, ‘चल ग सई वारूळाला’ यासारखी विविध पारंपरिक गाणी म्हणत फेर, फुगड्या, झिम्मा आदी खेळांचा महिलांनी आनंद लुटला. परिसरामध्ये बहुतांश ठिकाणी झाडाला बांधलेल्या झोपाळ्याचा आनंद लुटण्यासाठी महिलांची चढाओढ लागली होती. ठिकठिकाणी शेतशिवारमध्ये वारूळ पूजनासाठी महिलांनी गर्दी केली होती.