नारळी पौर्णिमेनिमित्त म्हस्कोबांच्या प्रतिमेची मिरवणूक

वाल्हे, ता. ८ : नारळी पौर्णिमेनिमित्त वाल्हे (ता. पुरंदर) गावठाणामधील राऊतआळी येथील म्हस्कोबा मंदिर ट्रस्टच्या वतीने ‘नारळी पोर्णिमा उत्सव’ विविध धार्मिक कार्यक्रमांद्वारे उत्साहात साजरा करण्यात आला. मंदिरामध्ये उत्सवमूर्तीला महाभिषेक करून गुलालाची मुक्त उधळण करीत म्हस्कोबांच्या प्रतिमेची पाना-फुलांनी सजविलेल्या आकर्षक बैलगाडीतून वाजत-गाजत मिरवणुक काढण्यात आली. भाविकांनी देवाचे दर्शन घेऊन ‘श्रीनाथ म्हस्कोबांचं चांगभलं’च्या जयघोषाने परिसर भक्तिमय होऊन गेला होता.
वाल्हे गावठाणमधील राऊतआळी येथील म्हस्कोबा मंदिरामध्ये नारळी पोर्णिमा उत्सव विविध धार्मिक कार्यक्रमांनी झाला. सकाळी राऊत समाज बांधवांच्या वतीने उत्सवमूर्ती म्हस्कोबांना दही-दुधाने अभिषेक घालण्यात आला. सायंकाळी पारंपरिक ढोलांच्या तालावर गुलालाची उधळण करीत म्हस्कोबांच्या प्रतिमेची सवाद्य मिरवणूक काढण्यात आली. मिरवणुकीदरम्यान ढोल-ताशांच्या गजरात ‘श्रीनाथ म्हस्कोबांचं चांगभलं’च्या जयघोषांनी परिसर भक्तिमय झाला होता. या मिरवणुकीमध्ये म्हस्कोबा मंदिर ट्रस्टचे अध्यक्ष चंद्रकांत राऊत, समदास राऊत,
रवींद्र दुर्गाडे, बाळासाहेब राऊत, पोपट राऊत, सुधाकर राऊत, दादासाहेब राऊत, किशोर राऊत, रवींद्र राऊत, अभिजित राऊत, मकरंद राऊत, कुणाल राऊत, सुनील राऊत, सुजित राऊत, शिरीष नवले सहभागी झाले होते. मिरवणूक राऊतआळी, गांधीचौक, कुंभारआळी, सावतामाळी मार्गे मंदिरात येऊन मिरवणुकीची सांगता झाली. सायंकाळी म्हस्कोबा मंदिर ट्रस्टच्या वतीने महाप्रसादाचे आयोजन केले होते. त्यानंतर जागरण गोंधळाचा कार्यक्रम झाला.