वाल्हे येथे पर्युषण पर्वास प्रांरभ

वाल्हे, ता. २८ : संयम, क्षमा व आत्मशुद्धीचा संदेश देणाऱ्या पर्युषण पर्वाच्या प्रांरभाने वाल्हे (ता. पुरंदर) येथील जैन समाजात भक्तिभावाची लहर उसळली. पारंपरिक वाद्यांच्या तालावर, धार्मिक उत्साहात आणि भक्तिपूर्ण वातावरणात श्री आदिनाथ दिगंबर जैन मंदिरात या पवित्र पर्वाची सुरुवात झाली.
यानिमित्ताने गुरुवारी (ता. २८) श्री आदिनाथ भगवान आणि पद्मावती मातेच्या मूर्तींना शास्त्रोक्त पद्धतीने दुग्धाभिषेक घालण्यात आला. प्रत्येक घरातील एका सदस्यास पंचामृताने अभिषेक करण्याचा मान देण्यात आला. त्यामुळे श्रावक- श्राविकांमध्ये विशेष उत्साह पाहायला मिळाला. याप्रसंगी उमेश शहा, संजय दोशी, विनय शहा, स्वप्नील दोशी, प्रतीक दोशी, यश शहा, सौगंध शहा, प्रीती शहा, सोनाली शहा, सविता शहा, सपना शहा, प्रतिभा शहा, स्वप्ना शहा, सुनीता दोशी, ऊर्मिला दोशी आदींसह श्रावक- श्राविका उपस्थित होते.
भाद्रपद शुद्ध पंचमीपासून सुरू होणाऱ्या या पर्वाचे १० दिवस अत्यंत पवित्र मानले जातात. या काळात काही जैन बांधव सलग १० दिवसांचे
उपवास करतात, तर काहीजण एकासन करून संयमाचे पालन करतात. पर्वाच्या निमित्ताने मंदिरात रोज सकाळी अभिषेक व सायंकाळी आरती आदी धार्मिक कार्यक्रमांचे आयोजन करण्यात आले आहे. बाल श्रावकांसाठीही सलग ११ दिवस विविध सांस्कृतिक आणि धार्मिक कार्यक्रमांचे आयोजन केले असून, मुलांमध्ये धर्माविषयी प्रेम निर्माण करण्याचा प्रयत्न आहे.
पर्युषण पर्वानंतर रविवारी (ता. ७) क्षमावाणी दिन आणि सांगता समारंभ होणार असून, त्यादिवशी सर्व भाविक एकमेकांची क्षमा मागून आत्मशुद्धीकडे वाटचाल करतात. पौराहित्य शीतल उपाध्ये यांनी केले. श्री आदिनाथ दिगंबर जैन ट्रस्टच्या वतीने १० दिवस संपूर्ण कार्यक्रमांचे संयोजन करण्यात आले आहे. पर्युषण पर्वाच्या १० दिवस पुणे येथील विनय शहा यांच्या वतीने महाप्रसाद वाटप असल्याचे शिरीष शहा व पराग शहा यांनी सांगितले.

05155