सनई-चौघड्यांच्या सुरात भैरवनाथ-जोगेश्वरींचा शाही विवाह

वाल्हे, ता. १० : पुरंदर तालुक्यातील वाल्हे येथील ग्रामदैवत श्री भैरवनाथ व देवी जोगेश्वरी यांचा शाही विवाह सोहळा मावळत्या सूर्याच्या साक्षीने आणि पारंपरिक थाटात उत्साहात पार पडला. सनई-चौघड्यांच्या मंगल स्वरात आणि हजारो भाविकांच्या उपस्थितीत हा ऐतिहासिक सोहळा झाला.
कालाष्टमीनिमित्त पहाटे साडेचार वाजता देवस्थान ट्रस्टचे अध्यक्ष संदेश शिर्के यांच्या हस्ते महाअभिषेक व महापूजा करण्यात आली. त्यानंतर मंदिर दर्शनासाठी खुले झाले. सकाळच्या सत्रात भावगीत व भक्तीगीतांचा कार्यक्रम झाला. अनेक भाविकांनी गूळ-पेढ्यांची शेरणी वाटून, तर काही भक्तांनी कावडींना नारळाचे तोरण बांधून दंडवत घालून नवस फेडले. उत्सवासाठी मंदिर परिसरात आकर्षक फुलांची सजावट करण्यात आली होती.
सायंकाळी पालखी व कावडीच्या प्रदक्षिणेनंतर ढोल-ताशांच्या गजरात मिरवणूक काढण्यात आली. ''नाथ साहेबाचं चांगभलं''च्या जयघोषाने परिसर दुमदुमून गेला होता. सायंकाळी ६ वाजता देवाचे पोशाख व मंडवळ्या वाजत-गाजत मंदिरात आणल्या गेल्या. विधिवत पूजेनंतर उत्सवमूर्तींना नवीन पोशाख व बाशिंगे बांधण्यात आली. सायंकाळी ६.४५ वाजताच्या शुभमुहूर्तावर मंगलाष्टका होऊन अक्षदा व गुलालाच्या उधळणीत शाही विवाह सोहळा पार पडला. यावेळी भाविकांवर रंग, गुलाल-खोबऱ्याची उधळण करण्यात आली. या मंगल क्षणाचे साक्षीदार होण्यासाठी भाविकांनी मोठी गर्दी केली होती. तर मंदिर परिसर हार-फुले, नारळ-गुलाल, खेळांच्या, पेढ्यांच्या दुकानांनी गजबजून गेला होता.