दौंड तालुक्याच्या जिरायती भागातील तलाव भरले

यवत, ता. ३० : मागील दहा दिवस सतत पडत असलेल्या पावसामुळे दौंड तालुक्याच्या जिरायती भागातील तलाव भरले आहेत. या भागातील सर्वात मोठे असलेले डोंबेवाडी व कासुर्डी तलावांच्याही सांडव्यातून पाणी वाहू लागले आहे. याचा पाझराखालील विहिरींना जास्त काळ पाणी टिकण्यास उपयोग होणार आहे.
ताम्हणवाडी तलाव (ताम्हणवाडी), दरेकरवाडी तलाव (भरतगाव), गावठाण तलाव (भांडगाव), टेमजाई व गझला तलाव तलाव (वाखारी), डोंबेवाडी, पद्मावती व फडतरे वस्ती तलाव (खोर) भरले असल्यामुळे भूजल पातळी वाढण्यास व ती टिकून राहण्यास मदत होणार आहे. पावसाने पिकांचे मोठे नुकसान झाले असले तरी पुढील पिकांसाठी विहिरींना जास्त काळ पाणी राहील, अशी शेतकऱ्यांना आशा आहे.
तलाव पूर्ण क्षमतेने भरले आहेत ही समाधानकारक बाब आहे. असे असले तरी वाफसा पाहून शेतकऱ्यांनी पूर्वमशागतीची कामे उरकून घ्यावीत. जिरायती पिकांसाठी पेरणीची घाई करू नये. पावसाने ओढ दिली तर पेरणी वाया जाऊ शकते.
- महेश रूपनवर, सहाय्यक तंत्रज्ञ, आत्मा ( ता.दौंड)