यवत येथील जमावबंदी मागे

यवत, ता. ६ : यवत (ता. दौंड) गावामध्ये धार्मिक तणावाच्या पार्श्वभूमीवर निर्माण झालेल्या कायदा व सुव्यवस्थेच्या प्रश्नावर जिल्हाधिकारी जितेंद्र डुडी यांनी १ ऑगस्टपासून पुढील आदेश होईपर्यंत जमावबंदी आदेश लागू केला होता. परिस्थिती आटोक्यात आल्यानंतर यवतचे पोलिस निरीक्षक नारायण देशमुख यांनी तहसीलदारांना पत्राद्वारे कळवले होते. जमावबंदी आदेशामुळे गावातील सर्व व्यवहार ठप्प झाले असून, दैनंदिन जनजीवन विस्कळित झाले आहे. तसेच, सद्यःस्थितीत यवत गावात शांतता प्रस्थापित झाली असल्याचे त्यांनी स्पष्ट केले. या अहवालाच्या अनुषंगाने जिल्हाधिकारी डुडी यांनी बुधवारी (ता. ६) रात्री १२ वाजल्यापासून येथील जमावबंदी आदेश संपुष्टात आणल्याचा आदेश दिला आहे.