यवतमध्ये पर्यावरणपूरक गणेशोत्सवाचा संदेश

यवत, ता. ७ : यवत (ता. दौंड) गावात विसर्जन मिरवणुकांचा विशेष जल्लोष पाहायला मिळाला. पोलिस प्रशासन, स्वयंसेवक मंडळे व ग्रामपंचायतीकडून योग्य ती व्यवस्था करण्यात आली होती. पर्यावरणपूरक गणेशोत्सवाचा संदेश देत काही मंडळांनी मूर्त्या तलावात विसर्जित केल्या, तर घरगुती गणेश मूर्तींना विहिरी व कालव्यामध्ये निरोप देण्यात आला.
भजन, आरती, ढोल- ताशांच्या गजरात, गणपती बाप्पा मोरयाच्या जयघोषात यवतकरांनी लाडक्या गणरायाला निरोप दिला. सकाळपासूनच आरत्या, भजने, पूजा यामुळे गणेशभक्तांमध्ये आनंदाचे वातावरण होते. शनिवारी दुपारपासूनच सार्वजनिक गणेश मंडळे, तसेच घरगुती गणपतीच्या विसर्जन मिरवणुका निघू लागल्या. विसर्जन मिरवणुकांना नागरिकांचा मोठा प्रतिसाद मिळाला. रांगोळ्या, फटाके, गुलाल, रोषणाईमुळे गावभर उत्साहाचे वातावरण होते.