कॅन्टोन्मेंट बोर्डाचा पाणीपुरवठा थकबाकीपोटी दिवसभर बंद

पुणे, ता. १५ : पुणे कॅन्टोन्मेंट बोर्ड आणि स्थानिक नागरिकांना दिलेल्या नळजोडांची थकबाकी जवळपास ७७ कोटी रुपयांवर पोचली आहे. वारंवार सूचना देऊनही बोर्ड ही थकबाकी देत नाही आणि कारवाईलाही विरोध होत आहे. या पार्श्‍वभूमीवर महापालिकेच्या पाणीपुरवठा विभागाने बुधवारी कॅन्टोन्मेंट बोर्डाचा संपूर्ण पाणीपुरवठाच बंद ठेवला. पुणे महापालिकेच्या वतीने पुणे आणि खडकी कॅन्टोन्मेंट बोर्डाला पाणीपुरवठा करण्यात येतो. पुणे कॅन्टोन्मेंट बोर्ड आस्थापनेकडे मागील अनेक वर्षांच्या पाणीबिलाचे ४८ कोटी रुपये थकीत आहेत. तर स्थानिक नागरिकांना पालिकेने काही वर्षांपूर्वी नळजोड दिले असून, त्याला मीटरही बसविण्यात आले आहेत. नागरिकांना दिलेल्या नळजोडांचेही २९ कोटी रुपये बिल थकले आहे.

थकबाकी वसुलीसाठी महापालिकेच्या वरिष्ठ अधिकाऱ्यां‍नी वेळोवेळी कॅन्टोन्मेंट बोर्डाच्या अधिकाऱ्‍यांसोबत बैठका घेतल्या आहेत. तसेच वेळोवेळी नोटिसाही दिल्या आहेत. थकबाकीदार नागरिकांचे नळजोड तोडण्यासाठी पालिकेने कारवाईदेखील केली होती. थकबाकी भरावी यासाठी संबंधितांना लोक अदालतीमध्ये उपस्थित राहाण्यासाठी नोटिसाही पाठविण्यात आल्या होत्या. परंतु, यानंतरही बोर्डाने अद्याप थकबाकी भरलेली नाही. तसेच कारवाई करण्यासाठी गेलेल्या अधिकारी व कर्मचाऱ्यांना नागरिकांकडून दमबाजी करण्यात येते. या पार्श्‍वभूमीवर पुणे महापालिकेच्या पाणीपुरवठा विभागाने पुणे कॅन्टोन्मेंट बोर्डाचा पाणीपुरवठा बुधवारी दिवसभर बंद ठेवला. तसेच उद्याही कमी दाबाने पाणीपुरवठा केला जाणार आहे, अशी माहिती पाणीपुरवठा विभागाच्या अधिकाऱ्‍यांनी दिली.