हृदयविकारावर उपचारांसाठी नवे यंत्रौ

सकाळ वृत्तसेवा

मुंबई, ता. २० : भायखळ्यातील जे.जे. समूह रुग्णालयात हृदयविकाराच्या उपचारांसाठी नवे यंत्र दाखल झाले आहे. हे यंत्र बायपास शस्त्रक्रियेसाठी खास वापरले जाणार आहे. आय. बी. पी. असे या यंत्राचे नाव असून ओएनजीसी कंपनीच्या सीएसआर फंडातून ३३ लाखांचे हे यंत्र रोटरी क्लब ऑफ मुंबईच्या वतीने जे.जे. रुग्णालयाला देण्यात आले आहे.
वैद्यकीय शिक्षण व संशोधन संचलनालयाचे सहसंचालक डॉ. अजय चंदनवाले, जे.जे. रुग्णालयाच्या अधिष्ठाता डॉ. पल्लवी सापळे, सहयोगी अधिष्ठाता डॉ. रणजीत माणकेश्वर, वैद्यकीय अधीक्षक डॉ. संजय सुरासे, प्राध्यापक डॉ. मनोज जोशी, समाजसेवक दत्तात्रय विभुते यांच्या उपस्थितीत सोमवारी (ता. १८) या यंत्राचे अनावरण केले. यावेळी रोटरी क्लब ऑफ मुंबईचे जिल्हाध्यक्ष डॉ. राजेंद्र अग्रवाल, ओएनजीसीचे अधिकारी किरण निकम उपस्थित होते.
जे.जे. समूह रुग्णालयात राज्य, तसेच देशभरातून उपचारांसाठी लाखो रुग्ण येत असतात. हृदयविकारावर बायपास शस्त्रक्रियेसाठी खासगी रुग्णालयात १० लाखांचा दर आकारला जातो. मात्र जे.जे. रुग्णालयात ही शस्त्रक्रिया माफक दरात उपलब्ध होईल, अशी माहिती जे.जे. रुग्णालय प्रशासनाने दिली.

बासपास शस्त्रक्रियेसाठी लागणाऱ्या यंत्रामुळे गरजू रुग्णांना मदत होणार आहे. रुग्णालयात दरवर्षी हजारहून अधिक गरजू रुग्णांच्या शस्त्रक्रिया पार पाडल्या जातील.
- डॉ. पल्लवी सापळे, अधिष्ठाता, जे.जे. समूह रुग्णालय.