एनडीए प्रवेशप्रक्रियेसाठी ऑनलाइन अर्ज प्रक्रिया सुरू

पुणे, ता. २ ः केंद्रीय लोकसेवा आयोगाच्या (यूपीएससी) वतीने राष्ट्रीय संरक्षण प्रबोधिनीच्या (एनडीए) १४९ व्या आणि नेव्हल अकॅडमीच्या (एनए) १११ व्या तुकडीच्या प्रवेश परीक्षेसाठी ऑनलाइन अर्ज प्रक्रिया सुरू झाली आहे. ही प्रवेश प्रक्रिया बारावीमध्ये असलेल्या व बारावी उत्तीर्ण झालेल्या मुला-मुलींसाठी असून, इच्छुक उमेदवारांना ११ जानेवारीपर्यंत ऑनलाइन अर्ज करता येईल.
गेल्या वर्षीपासून मुलींनादेखील एनडीएमध्ये प्रवेश घेण्याची संधी मिळाली. यंदाचा एनडीए आणि नेव्हल अकॅडमी प्रवेश प्रक्रियेअंतर्गत ४०० जागा असून, यामध्येही मुलींसाठी एकूण १९ राखीव जागा ठेवल्या आहेत. यामध्ये सैन्यदलासाठी १०, हवाईदलासाठी सहा आणि नौदलासाठी तीन या पद्धतीने मुलींची निवड केली जाणार आहे, तर नेव्हल अकॅडमीची प्रवेश प्रक्रिया केवळ मुलांसाठी आहे. या प्रवेश प्रक्रियेसाठी वयोमर्यादा ठेवली आहे. ही लेखी परीक्षा १० एप्रिल रोजी होण्याची शक्यता आहे. यासाठी पुणे, मुंबई, नागपूर, औरंगाबादसह देशातील ७० हून अधिक केंद्रावर ही परीक्षा घेण्यात येणार आहे. इच्छुक उमेदवारांना ११ जानेवारीपर्यंत अर्ज भरता येणार आहेत. या प्रवेश प्रक्रियेशी संबंधित अधिक माहिती व ऑनलाइन अर्ज भरण्यासाठी upsconline.nic.in या यूपीससीच्या अधिकृत संकेतस्थळाचा वापर करता येईल.