पुणे-मुंबई प्रवाशांसाठी सीझन पास सुविधा द्यावी

पुणे, ता. २ ः पुण्यातून मुंबईला दैनंदिन प्रवास करणाऱ्या प्रवाशांची संख्या मोठ्या प्रमाणात आहे. यामुळे रेल्वेला उत्पन्न देखील मोठ्या प्रमाणात मिळते. तरी सुद्धा कोरोनानंतर रेल्वे सेवा पुर्ववत होऊन ही नियमित प्रवास करणाऱ्या प्रवाशांसाठी मध्य रेल्वेने सीझन पास सुविधा सुरू केली नाही. तर दुसरीकडे मुंबई-नाशिक या मार्गावरील प्रवाशांसाठी सीझन पास सुविधा दिली आहे. मात्र, पुणे-मुंबई प्रवाशांसाठी ही सुविधा दिली नाही. तरी ही सुविधा द्यावी, अशी रेल्वे प्रवासी ग्रुपने केला आहे.
रेल्वे प्रवासी ग्रुपचे अध्यक्षा हर्षा शहा म्हणाल्या, ‘‘राज्यात सरकारने रेल्वे प्रशासनाला सीझन पास देण्याचे लेखी आदेश दिले आहेत. परंतु, या आदेशाला मध्य रेल्वेने केराची टोपली दाखवली आहे.’’

‘‘कोणत्या गाड्या सुरू कराव्यात, सीझन पास सुरू करणे, जनरल डबे सुरू करणे, आदी बाबतचे निर्णय मध्य रेल्वेच्या मुख्यालयातून घेतला जातात. ज्यावेळी याची अंमलबजावणी करण्यास सांगितले जाईल, त्यावेळी निर्णय घेतला जाईल.’’
- मनोज झंवर, जनसंपर्क अधिकारी, पुणे रेल्वे विभाग.

या आहेत, प्रवाशांच्या मागण्या
- लॉकडाऊनकाळात बंद केलेल्या सर्व रेल्वे गाड्या सुरू कराव्यात.
- नियमित प्रवास करणाऱ्या प्रवाशांसाठी राखीव जागा ठेवावी.
- जनरल डबे सुरू करावेत.
- प्रगती एक्स्प्रेस, सोलापूर इंटरसिटी सुरू करावी.
- लॉकडाऊन (२५ मार्च) पूर्वी काढलेले पास नियमित करावा.
- मध्य रेल्वेने पुणेकरांशी दुजाभाव करू नये.