परीक्षार्थींकडून चार कोटी घेणारे दोघे गजाआड

पुणे, ता. ६ : शिक्षक पात्रता परीक्षेत (टीईटी) मोठ्या प्रमाणात गैरप्रकार घडवून आणलेले रॅकेट उघडकीस आणण्यात पुणे पोलिसांच्या सायबर गुन्हे शाखेला यश आले आहे. या प्रकरणी पोलिसांनी नाशिक येथून आरोग्य विभागातील एक टेक्निशियन आणि चाळीसगाव येथून जिल्हा परिषदेच्या शाळेतील एका शिक्षकाला अटक केली आहे. दोघांनी ३५० परीक्षार्थींकडून तीन कोटी ८५ लाख रुपये घेऊन ते एजंटमार्फत मुख्य आरोपींना दिल्याचे तपासात समोर आले आहे.
सुरंजित गुलाब पाटील (वय ५०, रा. नाशिक) आणि स्वप्नील तीरसिंग पाटील (रा. जळगाव) अशी अटक केलेल्यांची नावे आहेत. आरोपींना प्रथमवर्ग न्यायलयात हजर केले असता न्यायदंडाधिकारी श्रध्दा डोलारे यांनी त्यांना १३ जानेवारीपर्यंत पोलिस कोठडीत ठेवण्याचा आदेश दिला. यापूर्वी अटकेत असलेले सुनील खंडू घोलप (वय ४८, रा. भोसरी) आणि मनोज शिवाजी डोंगरे (वय ४५, रा. लातूर) यांना ११ जानेवारीपर्यंत पोलिस कोठडी सुनावली आहे. या गुन्ह्यात यापूर्वी अटक केलेले तुकाराम सुपे, अभिषेक सावरीकर, प्रीतिश देशमुख, अंकुश हरकळ, संतोष हरकळ, अजय चव्हाण, कृष्णा जाधव, अंकित चनखोरे यांची न्यायालयीन कोठडीत रवानगी केली आहे. याप्रकरणात आतापर्यंत १२ आरोपींना अटक केली असून चार कोटी ६८ लाख रुपयांचा मुद्देमाल जप्त केला आहे.
या गुन्ह्यात यापूर्वी अटक आरोपी घोलप आणि डोंगरे यांची पोलिस कोठडीची मुदत संपल्याने त्यांना गुरुवारी (ता. ६) न्यायालयात हजर केले. आरोपी घोलप याचे तुकाराम सुपे आणि डॉ. प्रीतिश देशमुख यांच्याबरोबर मोबाईलवर चॅटिंग झाल्याचे निदर्शनास आले आहे. आरोपी घोलप हा सुपेकर याचा चालक असल्याने त्याने अनेक परिक्षार्थींकडून पैसे उकळल्याचा संशय पोलिसांनी व्यक्त केला असून याबाबत तपास सुरू आहे. आरोपी डोंगरे याने प्रीतिश देशमुख याच्याकडून रक्कम स्वीकारली असून ती कोणासाठी स्वीकारली याचा तपास करायचा आहे, असा युक्तिवाद सरकारी वकील विजयसिंह जाधव यांनी केला.

सुरंजित पाटीलने काय केले
पाटील याने २०१९ मध्ये झालेल्या टीईटी परीक्षेला बसलेल्या २०० परिक्षार्थींकडून प्रत्येकी एक लाख १० हजार रुपये घेतले. या परीक्षार्थींची यादी व दोन कोटी ३५ लाख रूपयाची रक्कम जमवली.

स्वप्नील पाटीलने काय केले
स्वप्नील पाटील याने देखील २०१९ मध्ये झालेल्या परिक्षेतील १५० परिक्षार्थींकडून प्रत्येकी एक लाख १० हजार रुपये घेतले. त्याने एकूण एक कोटी ५० लाख रुपये जमा केले.

संतोष आणि अंकुश हरकळला दिली रक्कम
दोघांनी ३५० परिक्षार्थींचे तीन कोटी ८५
लाख रुपये आरोपी संतोष हरकळ आणि अंकुश हरकळ यांना दिल्याचे कबूल केले आहे. सुरंजित आणि स्वप्नील यांनी संतोष आणि अंकुश हरकळ यांच्याशी संपर्क साधला. तसेच, टीईटी परिक्षा आणि २०१९ बसलेल्या परीक्षार्थींना पात्र करण्यासाठी नियोजित कट रचला आहे, असे ॲड. जाधव यांनी युक्तीवादादरम्यान सांगितले.