लोकसेवा हक्क आयोगाचा अहवाल जाहीर

पुणे, ता. १० : राज्य लोकसेवा हक्क आयोगाचा वार्षिक अहवाल नुकताच राज्य सरकारच्या ‘आपले सरकार’ पोर्टलवर प्रकाशित झाला. हा अहवाल सर्वसामान्य नागरिक आणि प्रशासनातील अधिकारी-कर्मचाऱ्यांसाठी मार्गदर्शक ठरणार आहे. नागरिकांनी संदर्भासाठी हा वार्षिक अहवालाचे अवलोकन करावे, असे आवाहन पुणे विभागाचे राज्य लोकसेवा हक्क आयुक्त दिलीप शिंदे यांनी केले. आयोगाचा वार्षिक अहवाल मराठी आणि इंग्रजी या दोन भाषांमध्ये आहे. त्यासोबतच नागरिकांकडून आयोगाकडे सातत्याने विचारणा करण्यात येणारे प्रश्नही मराठी आणि इंग्रजी भाषेत पोर्टलवर उपलब्ध करून दिले आहेत. याव्यतिरिक्त लोकसेवा हक्काबाबत नागरिकांकडून विचारले जाणारे प्रश्नही ‘आपले सरकार’ या पोर्टलवर उपलब्ध आहेत. ‘आपले सरकार’ पोर्टलवरील जलद सेवा, वापरण्यास सोपे आणि वेळेची बचत आदींच्या माध्यमातून लोकसेवा हक्काच्या प्रभावी अंमलबजावणीसाठी नागरिकांना मदत करण्यात येते.