चंद्रभागा व उपनद्या वर्षभरात स्वच्छ! | Sakal
sakal

बोलून बातमी शोधा

चंद्रभागा व उपनद्या वर्षभरात स्वच्छ!
चंद्रभागा व उपनद्या वर्षभरात स्वच्छ!

चंद्रभागा व उपनद्या वर्षभरात स्वच्छ!

sakal_logo
By

पुणे, ता. ११ ः चंद्रभागा (भीमा) व तिच्या उपनद्या निर्मळ व स्वच्छ करण्यासाठी सुमारे पाच वर्षांपूर्वी स्थापन करण्यात आलेल्या नमामी चंद्रभागा प्राधिकरण शक्ती प्रदत्त समितीची तिसरी बैठक येत्या गुरुवारी (ता. १३) मुंबईत आयोजित करण्यात आली आहे. या नद्या येत्या वर्षाअखेरीपर्यंत निर्मळ व स्वच्छ करण्याचा मानस असल्याचे पुण्याचे विभागीय आयुक्त सौरभ राव यांनी सांगितले.
मंत्रालयात गुरुवारी सकाळी ही बैठक आयोजित करण्यात आली असून, या समितीचे मुंबईतील सदस्य आणि काही आमंत्रित हे प्रत्यक्षपणे या बैठकीला उपस्थित राहणार आहेत. कोरोना संसर्गाच्या पार्श्‍वभूमीवर राज्यभरातील अन्य सदस्यांना व्हिडिओ कॉन्फरन्सिंगच्या माध्यमातून या बैठकीला उपस्थित राहावे लागणार आहे. तशा सूचना सरकारने दिल्या असल्याचेही राव यांनी स्पष्ट केले आहे.
राज्याच्या नगर विकास विभागाने १२ ऑगस्ट २०१६ रोजी एका अध्यादेशाद्वारे या प्राधिकरणाची स्थापना केलेली आहे. राज्याचे मुख्यमंत्री हेच या प्राधिकरणाचे अध्यक्ष आहेत. यानुसार या प्राधिकरणाचे पहिले अध्यक्ष तत्कालीन मुख्यमंत्री देवेंद्र फडणवीस होते. सध्या मुख्यमंत्री उद्धव ठाकरे हे अध्यक्ष आहेत. चंद्रभागा (भीमा) व तिच्या उपनद्या निर्मळ व प्रदूषणमुक्त करून या नद्यांचे संवर्धन करणे, हा प्राधिकरणाच्या स्थापनेमागचा उद्देश आहे. या या प्राधिकरणाची एक शक्ती प्रदत्त समिती स्थापन करण्यात आली आहे. या समितीची येत्या गुरुवारी तिसरी बैठक होत आहे. पुण्याचे विभागीय आयुक्त राव हे या समितीचे सदस्य सचिव आहेत.
या समितीत पश्‍चिम महाराष्ट्रातून पुण्याचे जिल्हाधिकारी डॉ. राजेश देशमुख यांच्यासह सोलापूरचे जिल्हाधिकारी, पुणे महानगर क्षेत्र विकास प्राधिकरणाचे आयुक्त, पुणे व पिंपरी चिंचवड या दोन्ही पालिकांचे आयुक्त आणि पुणे व सोलापूर जिल्हा परिषदांचे मुख्य कार्यकारी हे सदस्य आहेत. याशिवाय सामाजिक वनीकरण, जलसंपदा, कृषी, महाराष्ट्र औद्योगिक विकास महामंडळ, महाराष्ट्र जीवन प्राधिकरण आदी संस्थांचे वरिष्ठ अधिकारी हे सदस्य आहेत.

बैठकीची काय होणार?
- या प्रकल्पांतर्गत तयार केलेला माहितीपट व लघुपटाचे सादरीकरण
- पुणे व सोलापूर जिल्हा परिषदेच्या सिईओंनी सांडपाणी व्यवस्थापनावर तयार केलेल्या प्रस्तावांचे सादरीकरण
- पंढरपूर येथे भाविकांसाठी करावयाच्या सुविधांसाठी निधी वितरणाबाबत चर्चा व निर्णय घेणे
- या प्रकल्पावर आतापर्यंत झालेल्या खर्चाचा आढावा घेणे
- सदस्य सचिवांना निधी खर्च करण्याचा अधिकार प्रदान करणे

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
loading image
go to top