रात्री संचारबंदी; दिवसा जमावबंदी | Sakal
sakal

बोलून बातमी शोधा

रात्री संचारबंदी; दिवसा जमावबंदी
रात्री संचारबंदी; दिवसा जमावबंदी

रात्री संचारबंदी; दिवसा जमावबंदी

sakal_logo
By

मुंबई, ता. ८ ः राज्यातील कोरोना संसर्ग दिवसेंदिवस वाढत चालला असताना राज्य सरकारने आज सायंकाळी नवे निर्बंध लागू केले आहेत. आता राज्यभर रात्री अकरा वाजल्यापासून ते सकाळी पाच वाजेपर्यंत संचारबंदी असेल. विशेष म्हणजे याच काळात जीवनावश्यक वस्तूंची वाहतूक मात्र सुरूच राहील. मालवाहतुकीवर कोणतेही निर्बंध नसतील; केवळ कर्मचाऱ्यांनी कोरोना लसीचे दोन्ही डोस घेणे अनिवार्य असेल.
राज्यात दिवसा जमावबंदी राहणार असून, सकाळी पाच ते रात्री अकरापर्यंत पाचपेक्षा अधिक व्यक्तींना एकत्र येता येणार नाही. शाळा, महाविद्यालये १५ फेब्रुवारीपर्यंत बंद राहणार असली तरी इयत्ता दहावी आणि बारावीच्या बोर्डाकडून होणाऱ्या परीक्षा इतर सरकारी शैक्षणिक विभागांकडून नियोजित कृतिकार्यक्रमाला अपवादात्मक स्थितीत परवानगी असेल, असे राज्य सरकारकडून स्पष्ट करण्यात आले.


वर्क फ्रॉम होम कोणाला?
उत्तर ः खासगी कार्यालयांसाठी वर्क फ्रॉम होम करण्यात आले असून, ५० टक्क्यांपेक्षा अधिक जणांना परवानगी नाही. २४ तास सुरू राहणाऱ्या कार्यालयातील कर्मचारी अत्यावश्यक सेवेत गणले जातील.

लग्न समारंभांसह इतर कार्यक्रमांचे काय?
उत्तर ः विवाहसोहळा, सामाजिक, धार्मिक, सांस्कृतिक, राजकीय कार्यक्रमांना परवानगी असून, ५० लोकांची उपस्थितीच आवश्यक आहे.

अंत्यविधीसाठी किती लोक असावेत?
उत्तर ः अंत्यविधीसाठी केवळ २० जणांनाच परवानगी देण्यात आली आहे. त्यामुळे गर्दी टाळावी.

सार्वजनिक वाहतुकीची सुविधा आहे का?
उत्तर ः सार्वजनिक वाहतूक (एसटी, पीएमपी) सेवा सुरू राहणार असून, दोन डोस घेतलेल्यांना या वाहनांतून प्रवास करता येणार आहे. लोकल ट्रेनवर कोणतेही निर्बंध नाहीत.


चित्रपट, नाट्यगृहांचे काय?
उत्तर ः चित्रपट, नाट्यगृहे खुली राहणार असून, रात्री १० ते सकाळी ८ या वेळेत ती बंद ठेवावी लागणार आहेत. या गृहांच्या क्षमतेच्या ५० टक्के लोक हजर राहू शकतात. तसेच लशीचे दोन्ही डोस घेतलेल्या नागरिकांच परवानगी देण्यात आली आहे..

मॉल सुरू राहणार आहेत ?
उत्तर ः तुम्हाला मॉलमध्ये खरेदीचा आनंद लुटता येणार आहे. मात्र त्यासाठी तुमचे दोन्ही डोस झालेले असावेत. मॉल ५० टक्के क्षमतेसह सुरू राहणार आहेत. रात्री १० ते सकाळी ८ पर्यंत ते बंद राहतील.

जिमला जाता येईल का?
उत्तर ः तुम्हाला जिम, स्पा, जलतरण तलाव, क्रीडा संकुलांत जाता येणार नाही. कारण सरकारच्या नियमावलीनुसार ती बंद राहणार आहेत.

केशकर्तनालयांचे काय?
उत्तर ः केशकर्तनालयांना मुभा देण्यात आली असून, ती केवळ ५० टक्के क्षमतेने सुरू राहतील. रात्री दहा ते सकाळी सात या वेळेत मात्र ती बंद ठेवावी लागणार आहेत.

उद्याने खुली आहेत का?
उत्तर ः नव्या नियमावलीनुसार मनोरंजन उद्याने, प्राणिसंग्रहालये, संग्रहालये बंद राहणार आहेत. त्यामुळे पुढील काही दिवस तरी तुम्हाला तेथे जाता येणार नाही.

हॉटेल्स, रेस्टॉरंट बंद असतील का?
उत्तर ः नव्या नियमावलीत हॉटेल्स आणि रेस्टॉरंटला दिलासा मिळाला असून, सकाळी १० ते रात्री ८ या वेळेत ५० टक्के क्षमतेने चालविता येणार आहे. हॉटेल, रेस्टॉरंटमध्ये लसीकरण झालेल्यांनाच प्रवेश असणार आहे. दुकाने, हॉटेल, रेस्टॉरंटमध्ये काम करणाऱ्यांचे लसीकरण अनिवार्य आहे.

आंतरराज्यीय प्रवास करता येईल का?
उत्तर ः महाराष्ट्र राज्यात प्रवेश करायचा असेल तर दोन्ही डोस अनिवार्य करण्यात आले आहेत. तसेच आरटीपीसीआर चाचणीचा निगेटिव्ह रिपोर्ट आवश्यक आहे.

होम डिलिव्हरीबाबत काय निर्णय आहे?
उत्तर ः राज्यात होम डिलिव्हरी सेवा पूर्णवेळ सुरू राहणार असून, नागरिकांना घरबसल्या खाद्यपदार्थ, वस्तू मागविता येणार आहेत.

शाळा, महाविद्यालयांचे काय?
उत्तर ः शाळा, महाविद्यालये १५ फेब्रुवारीपर्यंत बंद राहणार असून, पुढील परिस्थितीनंतर त्याबाबतचा निर्णय होणार आहे.

स्पर्धा परीक्षार्थींना प्रवास करता येईल?
उत्तर ः एमपीएससी, यूपीएससी परीक्षेसाठी किंवा स्पर्धा परीक्षांसाठी प्रवास करणाऱ्या विद्यार्थ्यांना हॉल तिकिटावर प्रवास करण्याची मुभा दिली आहे.

क्रीडा स्पर्धा सुरू राहतील का?
उत्तर ः नियोजित राष्ट्रीय आणि आंतरराष्ट्रीय क्रीडा स्पर्धांना या निर्बंधांतून सूट देण्यात आली आहे. खेळाडूंना बायो बबलमध्ये राहावे लागणार आहे. प्रेक्षकांना मैदानात उपस्थित राहता येणार नाही. दर तीन दिवसांनी खेळाडूंची कोरोना चाचणी करणे बंधनकारक आहे.

आंतरराष्ट्रीय विमानप्रवासाचे काय?
उत्तर ः आंतरराष्ट्रीय विमानप्रवासावर कोणतेही निर्बंध नसून, केंद्र सरकारच्या नियमावलीनुसार आंतरराष्ट्रीय प्रवास सुरू राहणार आहे.


कोट
आपल्याला कुठलाही लॉकडाउन करून सगळं ठप्प करायचं नाही. केवळ कायदे आणि नियम करून अशा आव्हानांचा मुकाबला होऊ शकणार नाही, तर प्रत्येक नागरिकाने मग तो समाजातला कुणीही घटक असो प्रत्येकाने आता ही लढाई अंतिम आहे आणि कोरोनावर हा शेवटचा घाव करायचाच अशा निश्चयाने नियम पाळायचे आहेत. आपल्याला काम बंद करायचे नाही, तर गर्दी बंद करायची आहे. रोजीरोटी बंद करायची नाही, जीवन थांबू द्यायचे नाही; पण काही बंधने पाळून या विषाणूपासून राज्य कायमचे मुक्त करायचे आहे.
- उद्धव ठाकरे, मुख्यमंत्री

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
loading image
go to top