पुणे : रिक्त पदांच्या भरतीसाठी ऑनलाइन रोजगार मेळावा

पुणे : जिल्हा कौशल्य विकास, रोजगार व उद्योजकता मार्गदर्शन केंद्राच्या वतीने बुधवारी (ता. २) पंडीत दीनदयाल उपाध्याय रोजगार मेळाव्याचे आयोजन करण्यात आले आहे. या मेळाव्यासाठी उद्योजकांनी ऑनलाइन रिक्तपदे अधिसूचित केली आहेत. दहावी, बारावी, पदवीधर व आयटीआय इलेक्ट्रीशियन, डीएमई, बीई, कॉम्पुटर ऑपरेटर, सेल्स एक्झिक्युटिव्ह, सेल्स कन्सल्टंट, इंजिनिअरिंग डिम्प्लोमा अशी रिक्त पदे उपलब्ध आहेत.

आवश्यक पात्रताप्राप्त उमेदवारांनी या संधीचा लाभ घ्यावा. या मेळाव्यात सहभागी होण्यासाठी या विभागाच्या https://rojgar.mahaswayam.gov.in या संकेतस्थळावर उपलब्ध रिक्त पदांसाठी नोंदणी करावी. एम्प्लॉयमेंट नोंदणी असलेल्या उमेदवारांनी युजर आयडी व पासवर्डने लॉग इन होऊन ऑनलाइन अर्ज करावा. तसेच, ज्यांची नोंदणी झालेली नाही त्यांनी प्रथम नोंदणी करून नंतर अर्ज करावा. या वेबपोर्टलवर रोजगाराबाबत दररोज माहिती अपडेट करण्यात येते.

तरी उमेदवारांनी रोजगार मेळाव्याच्या कालावधीत दररोज माहिती बघून पसंतीनुसार अर्ज करावेत, असे आवाहन रास्ता पेठेतील जिल्हा कौशल्य विकास, रोजगार व उद्योजकता मार्गदर्शन केंद्राच्या सहायक आयुक्त अनुपमा पवार यांनी केले आहे. संपर्क दूरध्वनी क्रमांक ०२०-२६१३३६०६