गिरीश महाजनांच्या निकटवर्तीयांच्या घरातुन मोठ्या प्रमाणात कागदपत्रे जप्त

पुणे, ता. ११ ः जळगावमधील शैक्षणिक संस्था ताब्यात घेण्यासाठी संचालकाचे अपहरण करून खंडणी मागितल्याप्रकरणी भाजपचे नेते गिरीश महाजन यांच्यासह २९ जणांविरुद्ध दाखल गुन्ह्यात पुणे पोलिसांच्या पथकाने जळगाव येथे महाजन यांच्या निकटवर्तीयांच्या घराची झडती घेतली. पोलिसांनी यात मोठ्या प्रमाणात महत्त्वाची कागदपत्रे जप्त केली आहेत.
गिरीश दत्तात्रेय महाजन (रा. जामनेर, जळगाव), तानाजी भोईटे (रा. कोंढवा), नीलेश भोईटे, वीरेंद्र भोईटे (रा. भोईटेनगर, जळगाव) यांच्यासह २९ जणांविरुद्ध कोथरूड पोलिस ठाण्यात गुन्हा दाखल झाला होता. ॲड. विजय पाटील (वय ५२) यांनी कोथरूड पोलिस ठाण्यात जानेवारी २०२१ मध्ये याप्रकरणी फिर्याद दिली होती. जळगावमधील जिल्हा मराठा विद्या प्रसारक सहकारी समाज मर्यादित या शैक्षणिक संस्थेचे ॲड. विजय पाटील संचालक आहेत. संबंधित संस्था भाजपचे गिरीश महाजन यांना पाहिजे होती. त्यासाठी महाजन यांनी ॲड. पाटील यांना एक कोटी रुपये देण्याचे आमिष दाखविले. परंतु पाटील यांनी त्यांना नकार दिला. त्यामुळे आरोपींनी त्यांना पुण्यात बोलावून सदाशिव पेठेतील एका सदनिकेमध्ये डांबून ठेवून मारहाण केली होती. तसेच ॲड. पाटील यांनी संस्थेच्या सर्व संचालकांचे राजीनामे आणले नाहीत, तर त्यांना ‘एमपीडीए’च्या गुन्ह्यात अडकविण्याची धमकी देत त्यांच्याकडून पाच लाख रुपयांची खंडणी घेतली होती.
दरम्यान, पुणे पोलिसांच्या एका पथकाने रविवारी जळगाव येथे या प्रकरणातील संशयित आरोपींच्या घरांमध्ये झडती घेतली. दोन दिवस झडती घेण्याचे काम सुरू होते. त्यांच्या घरातून पोलिसांनी मोठ्या प्रमाणात महत्त्वाची कागदपत्रे जप्त केली आहेत. झडती घेतलेल्या व्यक्तींमध्ये बहुतांशजण गिरीश महाजन यांचे निकटवर्तीय आहेत. सहाय्यक पोलिस आयुक्तांच्या मार्गदर्शनाखाली ४० जणांचे पथक जळगावला गेले होते.