खंडणी मागणाऱ्या दोघांना अटक

पुणे, ता. १५ : कारागृहातील गुंडाचा सहकारी असल्याचे सांगून दुग्ध व्यावसायिकास जीवे मारण्याची धमकी दिली, तसेच दोन लाखांची खंडणी मागणाऱ्या दोघांना लोणी काळभोर पोलिसांनी अटक केली.
राजेंद्र ऊर्फ राजू विजय गायकवाड (रा. शिंदावणे) व घनश्‍याम ऊर्फ गणेश आत्माराम शिंदे (रा. कुंजीरवाडी) अशी अटक केलेल्यांची नावे आहेत. याप्रकरणी अण्णासाहेब खलसे (रा. कुंजीरवाडी) यांनी लोणी काळभोर पोलिस ठाण्यात फिर्याद दिली. खलसे व त्यांच्या भावाचा दुधाचा व्यवसाय आहे. आरोपींनी ४ ते ११ डिसेंबर कालावधीत खलसे यांच्या भावाला फोन केला. आपण कारागृहात शिक्षा भोगत असलेला आरोपी विष्णू जाधव याचे साथीदार असल्याचे सांगितले. तसेच, त्यांनी दोन लाख रुपये न दिल्यास जीवे मारू, अशी धमकी दिली होती. याप्रकरणी गुन्हा दाखल झाल्यानंतर पोलिसांनी आरोपींचा शोध घेऊन अटक केली.