तिळगुळ घ्या... गोड बोला ! | Sakal
sakal

बोलून बातमी शोधा

तिळगुळ घ्या... गोड बोला !
तिळगुळ घ्या... गोड बोला !

तिळगुळ घ्या... गोड बोला !

sakal_logo
By

पुणे शहरात संक्रांतीनिमित्त शुभेच्छांचे वाण

पुणे, ता. १४ : ‘तिळगुळ घ्या... गोड बोला’ म्हणत आप्तांना दिलेला तिळगुळ... स्रियांनी बोरे, गाजर, भुईमुगाच्या शेंगा, गव्हाच्या ओंब्या यांचे सुगड्यात घालून दिलेले वाण... हळदी-कुंकवाचे छोटेखानी समारंभ आणि जोडीला ‘ढिल दे रे’ म्हणत लहान मुलांनी घेतलेला पतंग उडवण्याचा आनंद... अशा उत्साही वातावरणात शहरात शुक्रवारी मकर संक्रांतीचा सण साजरा करण्यात आला.
गेल्या काही दिवसांपासून शहरात थंडी वाढली होती. या थंडीपासून बचाव करण्यासाठी शरीरात उष्णता निर्माण व्हावी तसेच कोरोनापासून संरक्षण व्हावे, अशा शुभेच्छा संक्रांतीनिमित्त देत नागरिकांनी परस्परांना तिळगुळाचे वाटप करत एकमेकांना शुभेच्छांचे वाण दिले.
शहरातील विविध मंदिरांना संक्रांतीनिमित्त आकर्षक सजावट करण्यात आली होती. देवी-देवतांना तिळगुळाचा नैवेद्य दाखवण्यात आला. स्त्रियांनी देवतांचे दर्शन घेऊन त्यांना वाण अर्पण केले. त्यांनंतर परस्परांना हळदी-कुंकू लावून बोरे, गाजर, भुईमुगाच्या शेंगा, गव्हाच्या ओंब्या यांचे सुगड्यात घालून वाण दिले.

हलव्याच्या दागिन्यांनी मुले नटली
कोरोना निर्बंधांमुळे गर्दी करण्यास प्रतिबंध असल्याने हळदी-कुंकू समारंभ छोटेखानी प्रमाणात साजरे झाले. यासह विविध ठिकाणी बिस्किटे, गोळ्या, बोरे, चुरमुरे आदींनी लहान मुलांचे बोरन्हाण केले गेले. मुकूट, हार, कानातले असे आकर्षक पद्धतीने तयार केलेले हलव्याचे दागिने आणि काळ्या रंगाचे परकर-पोलके व कुर्ते घालून लहान मुले नटली होती.
ःः
नव दांपत्यांना काळे कपडे भेट
नवविवाहीत वधू आणि जावयाचेही संक्रांतीला कौतुक केले जाते. त्यामुळे नुकतेच लग्न झालेल्या दांपत्यांना नवीन काळे कपडे भेट देण्यात आले. तसेच स्त्रियांनी मंगळसूत्र, कानातले, बाजूबंद, अंगठी असे हलव्याचे दागिने परिधान केले होते. तर बच्चेकंपनीने दिवसभर पतंग उडवण्याचा आनंद घेतला. रंगीबेरंगी पतंगी आकाशात उंच उडवण्यासाठी आणि एकमेकांचे पतंग कापण्यासाठी चुरस रंगल्याचे पाहायला मिळाले.

35535

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
loading image
go to top