जिल्हा बँकेचा आज ठरणार अध्यक्ष | Sakal
sakal

बोलून बातमी शोधा

जिल्हा बँकेचा आज ठरणार अध्यक्ष
कीटकनाशकांच्या वापरामुळेही डोकावतो आत्महत्येचा विचार वर्ध्यातील तुलनात्मक अभ्यास, शेतकऱ्यांच्या मानसिकतेवर विपरीत परिणाम

जिल्हा बँकेचा आज ठरणार अध्यक्ष

sakal_logo
By

पुणे, ता. १४ : पुणे जिल्हा मध्यवर्ती सहकारी बॅंकेच्या (पीडीसीसी) अध्यक्षपदी अनुभवी संचालकाची तर, उपाध्यक्षपदी नव्या चेहऱ्याला संधी मिळणार असल्याचे संकेत राष्ट्रवादी काँग्रेसकडून मिळाले आहेत. अध्यक्षपदासाठी विद्यमान अध्यक्ष रमेश थोरात यांचे नाव अग्रक्रमावर असल्याची चर्चा शुक्रवारी (ता.१४) दिवसभर बॅंकेच्या वर्तुळात रंगली. थोरात यांच्यासह माजी अध्यक्ष प्रा. दिगंबर दुर्गाडे (पुरंदर), आमदार दिलीप मोहिते (खेड), विकास दांगट (हवेली) आणि बॅंकेचे माजी उपाध्यक्ष संजय काळे (जुन्नर) यांची नावे चर्चेत आहेत.

बॅंकेच्या उपाध्यक्षपदावर नवीन चेहऱ्याला संधी दिली जाईल, अशी चर्चा राष्ट्रवादी काँग्रेसमध्ये सुरू आहे. नवीन चेहऱ्यांमध्ये पूजा बुट्टे पाटील (जुन्नर), संभाजी होळकर (बारामती) आणि सुनील चांदेरे (मुळशी) यांची नावे चर्चेत आहेत. मात्र या पदावर पुन्हा महिलेला संधी दिल्यास, पूजा बुट्टे यांची निवड होईल, असाही एक मतप्रवाह निर्माण झाला आहे.
बॅंकेचे विद्यमान अध्यक्ष रमेश थोरात सलग आठव्यांदा बॅंकेवर संचालक म्हणून निवडून आले आहेत. थोरात यांची ही बॅंकेवरील शेवटची टर्म मानली जात आहे. त्यामुळे सर्वात ज्येष्ठ, शेवटची टर्म आणि दौंडला पक्षाचा आमदार नसल्याने थोरात यांनाच या पदावर पुन्हा एकदा संधी मिळण्याची शक्यता निर्माण झाली आहे. खेडचे आमदार दिलीप मोहिते पाटील अध्यक्षपदासाठी तीव्र इच्छुक असले तरी, सध्या जिल्हा परिषदेचे अध्यक्षपद खेड तालुक्याकडे आहे. त्यामुळे या मुद्द्यावर मोहिते पाटील यांचे नाव मागे पडण्याची शक्यता वर्तविली जात आहे. पूजा बुट्टे पाटील यांची उपाध्यक्षपदी वर्णी लागल्यास, एकच तालुका असल्याने काळे यांचे नाव मागे पडणार आहे. थोरात यांचे नाव ऐनवेळी मागे पडल्यास, दुर्गाडे यांच्या नावावर एकमत होण्याची शक्यता आहे.

जिल्हा बॅंकेच्या २०२१-२०२६ या पाच वर्षाच्या कार्यकाळासाठीच्या संचालक मंडळाच्या निवडीसाठी २ जानेवारी २०२२ रोजी निवडणूक झाली होती. ४ जानेवारीला मतमोजणी होऊन, निकाल जाहीर करण्यात आले. संचालक मंडळाच्या २१ पैकी १६ जागा जिंकत, सत्ताधारी राष्ट्रवादी काँग्रेसने पुन्हा एकदा बॅंकेवर निर्विवाद वर्चस्व स्थापित केले आहे. याशिवाय राष्ट्रवादी काँगेसचेच विकास दांगट अपक्ष म्हणून निवडून आलेले आहेत. ते केवळ कागदोपत्री अपक्ष आहेत. त्यामुळे त्यांचे नाव अध्यक्षपदाच्या स्पर्धेत घेतले जात आहे.

आज दुपारी एक वाजता होणार निवड
बॅंकेचे नवे अध्यक्ष आणि उपाध्यक्ष निवडण्यासाठी निवडणूक निर्णय अधिकारी मिलिंद सोबले यांनी उद्या (ता. १५) दुपारी एक वाजता नवीन संचालक मंडळाची सभा बोलाविली आहे. सोबले हेच या सभेचे पीठासीन अधिकारी असणार आहेत. या सभेत नवीन अध्यक्ष आणि उपाध्यक्षांची निवड केली जाणार आहे.

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
loading image
go to top