यशवंत ब्रिगेडद्वारे मंगळवारी मंत्रालयासमोर महामोर्चा

पुणे, ता. १५ धनगर समाजाचा अनुसूचित जमातीमध्ये (एसटी) अनेक वर्षांपासून लढा सुरू आहे. परंतु महाविकास आघाडी सरकारचे त्याकडे दुर्लक्ष होत आहे. आरक्षण नसल्याने धनगर समाजाचा शैक्षणिक, आर्थिक, राजकीय विकास खुंटला आहे. त्यामुळे धनगर समाजामध्ये असंतोष निर्माण झाला आहे. प्रशासनाने या समाजाच्या प्रश्‍नांना सोडविण्यासाठी त्यांच्या मागण्या पूर्ण कराव्यात. यासाठी यशवंत ब्रिगेड संघटना व इतर संघटनांच्या माध्यमातून मंगळवारी (ता. २२) मुंबई येथील मंत्रालयासमोर धनगर समाजाचा महामोर्चा काढणार आहे, अशी माहिती संघटनेचे अध्यक्ष बापूराव सोलनकर यांनी मंगळवारी पत्रकार परिषदेत दिली.

यावेळी गणपत देवकाते, चंद्रकांत वाघमोडे, वसंत घुले, सोमनाथ देवकाते आदी उपस्थित होते. सोलनकर म्हणाले, ‘‘डॉ. बाबासाहेब आंबेडकरांनी घटनेमध्ये धनगर समाजाला अनुसूचित जातीचे आरक्षण दिलेले आहे. परंतु, त्याची अंमलबजावणी झाली नाही. राज्यातील धनगर समाजाची लोकसंख्या दोन कोटींच्या वर आहे, हे राज्य सरकारला माहिती नसावे. त्याचीच जाणीव करून देण्यासाठी हा महामोर्चा काढणार आहे. तसेच २८ फेब्रुवारी रोजी बारामती येथे सकाळी अकरा वाजता धरणे आंदोलन ही करण्यात येईल. त्यामुळे सरकारने विधानसभेचे अर्थसंकल्पीय अधिवेशनात धनगर समाजाच्या मागण्यांचा गांभीर्याने विचार करावा.’’

प्रमुख मागण्या ः
- अहिल्यादेवी शेळी-मेंढी आर्थिक विकास महामंडळासाठी एक हजार कोटींची तरतूद करावी
- धनगर समाजाचा अनुसूचित जमातीमध्ये (एसटी) आरक्षणाची अंमलबजावणी करावी
- नवउद्योजकांना विनातारण दहा लाख कर्ज पुरवठा करावा
- ओबीसी आरक्षण पुर्ववत होण्यासाठी तीन महिन्यांच्या आत इंपेरीकल डाटा तयार करावा
- शेळी-मेंढी यांच्यावर उपचार व लसीकरण करण्यासाठी सुसज्ज मोबाईल हॉस्पिटल असावे